ທະນາຄານໂລກຢືນຢັນການສະຫນັບສະຫນູນຢ່າງໜັກແໜ້ນໃນການພັດທະນາແບບທົ່ວເຖິງ ແລະ ຍືນຍົງ
ນະຄອນຫຼວງວຽງຈັນ, ວັນທີ 23 ມີຖຸນາ 2014 - ທ່ານ. ແອັກເຊລ ວັນ ຕຼອດເຊັນເບີກ, ຮອງປະທານທະນາຄານໂລກ ປະຈຳພາກພື້ນອາຊີຕາເວັນອອກ ແລະ ປາຊີຟິກ, ໄດ້ຢືນຢັນຄວາມມຸ່ງໝັ້ນເອົາໃຈໃສ່ຂອງທະນາຄານໂລກ ໃນການສະໜັບສະໜູນລັດຖະບານ ສປປ. ລາວ ໃຫ້ກ້າວໄປສູ່ການພັດທະນາແບບທົ່ວເຖິງ ແລະ ຍືນຍົງ ພາຍຫຼັງທີ່ໄດ້ສິ້ນສຸດການມາຢ້ຽມຢາມ ສປປ. ລາວ ຢ່າງເປັນທາງການ ເປັນເວລາ 3 ວັນ.
ທ່ານ. ແອັກເຊລ ວັນ ຕຼອດເຊັນເບີກ, ຮອງປະທານທະນາຄານໂລກ ປະຈຳພາກພື້ນອາຊີຕາເວັນອອກ ແລະ ປາຊີຟິກ ໄດ້ກ່າວວ່າ: "ສປປ. ລາວ ເປັນໜຶ່ງໃນບັນດາເສດຖະກິດທີ່ຂະຫຍາຍຕົວໄວທີ່ສຸດໃນພາກພື້ນ ແລະ ຄວາມກ້າວໜ້າໃນການບັນລຸເປົ້າໝາຍວຽກງານຫຼຸດຜ່ອນຄວາມທຸກຍາກກໍ່ເຫັນໄດ້ວ່າພົ້ນເດັ່ນຫຼາຍ. ສປປ. ລາວ ໃນປັດຈຸບັນ ແມ່ນໄດ້ປະເຊີນໜ້າກັບສິ່ງທ້າທາຍຈາກການຂະຫຍາຍຕົວຢ່າງຕໍ່ເນື່ອງຂອງເສດຖະກິດທີ່ໄວວາ ແລະ ສິ່ງທ້າທາຍ ຈາກການຫຼຸດຜ່ອນຄວາມທຸກຍາກໃນໄລຍະຍາວ."
ທ່ານ ວັນ ຕຼອດເຊັນເບີກ ໄດ້ເຂົ້າຢ້ຽມຄ່ຳນັບ ພະນະທ່ານ ສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີ ແຫ່ງ ສປປ. ລາວ, ພະນະທ່ານ ດຣ. ລຽນ ທິແກ້ວ, ລັດຖະມົນຕີວ່າການກະຊວງການເງິນ, ແລະ ພະນະທ່ານ ສົມພາວ ໄຟສິດ, ຜູ້ວ່າການທະນາຄານແຫ່ງ ສປປ. ລາວ, ເພື່ອປຶກສາຫາລືບັນດາທັດສະນະການຈະເລີນເຕີບໂຕ ລວມທັງ ການພັດທະນາ ໃນຂະແໜງການເງິນພາກລັດ ແລະ ພາກທະນາຄານການເງິນ. ທ່ານໄດ້ຮັບຮູ້ເຖິງມາດຕະການ ຂອງລັດຖະບານ ກ່ຽວກັບນະໂຍບາຍການຫຼຸດຜ່ອນລາຍຈ່າຍ ແຕ່ກໍ່ຍັງໄດ້ຢັ້ງຢືນເຖິງຄວາມສຳຄັນ ໃນການປົກປ້ອງບັນດາແຜນງານ ທີ່ແນໃສ່ຊ່ວຍເຫຼືອຜູ້ທຸກຍາກ.
ທ່ານ ວັນ ຕຼອດເຊັນເບີກໄດ້ເດີນທາງໄປ ບ້ານຫາດງຳ, ເມືອງປາກແຊງ, ແຂວງຫລວງພະບາງ ເພື່ອຢ້ຽມຢາມປະຊາຊົນ ຜູ້ທີ່ໄດ້ຮັບຜົນປະໂຫຍດ ຈາກໂຄງການຊ່ວຍເຫຼືອຂອງທະນາຄານໂລກ ກໍ່ຄືກອງທຶນຫຼຸດຜ່ອນຄວາມທຸກຍາກ (ທລຍ/PRF) ເຊິ່ງເປັນຫນຶ່ງໃນບັນດາ ໂຄງການຫຼຸດຜ່ອນຄວາມທຸກຍາກໃນຊົນນະບົດ ທີ່ກວມລວມຫຼາຍຂະແຫນງການ ທີ່ໃຫຍ່ທີ່ສຸດໃນ ສປປ. ລາວ.
ທ່ານ. ວັນ ຕຼອດເຊັນເບີກ ກ່າວວ່າ "ກອງທຶນຫຼຸດຜ່ອນຄວາມທຸກຍາກນີ້ ແມ່ນໄດ້ໃຫ້ອໍານາດແກ່ຊຸມຊົນທ້ອງຖິ່ນ ໃນການເລືອກ ແລະ ຕັດສິນບັນດາບູລິມະສິດການພັດທະນາ ກໍ່ຄືການຄຸ້ມຄອງຊັບພະຍາກອນຂອງພວກເຂົາເອງ. ຢູ່ບ້ານຫາດງຳ, ປະຊາຊົນໄດ້ຕັດສິນໃຈເລືອກເອົາການປຸກສ້າງໂຮງຮຽນ ກ່ອນການສ້າງນ້ຳລິນ ເພື່ອຫຼຸດຜ່ອນເວລາໃນການເດີນທາງ ໃຫ້ລູກຫຼານບໍ່ຕ້ອງເດີນທາງໄກໄປເຂົ້າໂຮງຮຽນຢູ່ບ້ານອື່ນ ເຊິ່ງມັນໄດ້ສົ່ງຜົນໃຫ້ອັດຕາການເຂົ້າຮຽນເພີ່ມຂຶ້ນ. ຂ້າພະເຈົ້າຂໍຍ້ອງຍໍບ້ານຫາດງຳ ທີ່ຕັດສິນໃຈລົງທຶນເພື່ອອະນາຄົດຂອງລູກຫຼານຂອງເຂົາເຈົ້າ."
ນັບຕັ້ງແຕ່ປີ 2002 ເປັນຕົ້ນມາ, ຈຳນວນຜູ້ໄດ້ຮັບຜົນປະໂຫຍດຈາກໂຄງການກອງທຶນຫຼຸດຜ່ອນຄວາມທຸກຍາກນີ້ ແມ່ນລວມມີກວ່າ 1 ລ້ານຄົນ ເຊິ່ງໄດ້ຮັບຜົນປະໂຫຍດຈາກການກໍ່ສ້າງຖະຫນົນຫົນທາງ, ໂຮງຮຽນ, ຂົວ, ສຸກສາລາ, ຈຸດສະຫນອງນ້ໍາ, ແລະ ລະບົບຊົນລະປະທານ. ປັດຈຸບັນນີ້, ໂຄງການກອງທຶນຫຼຸດຜ່ອນຄວາມທຸກຍາກ ໄລຍະ 2 ແມ່ນຢູ່ໃນໄລຍະການຈັດຕັ້ງປະຕິບັດ ເຊິ່ງແນໃສ່ຊ່ວຍເຫຼືອ 1200 ບ້ານ ໃນ 38 ເມືອງ ໃນ 10 ແຂວງ.
