វ៉ាស៊ីនតោន ថ្ងៃទី១៦ ខែកញ្ញា ឆ្នាំ២០២១ – លោកស្រី Manuela V. Ferro, (ម៉ានូអែឡា ហ្វេរ៉ូ) ដែលជាសេដ្ឋវិទូ និងជាអ្នកដឹកនាំជាន់ខ្ពស់មួយរូបនៃធនាគារពិភពលោក ពេលនេះមានតំណែងថ្មីជាអនុប្រធាននៃធនាគារនេះទទួលបន្ទុកតំបន់អាស៊ីបូព៌ា និងប៉ាស៊ីហ្វ៊ិក។
មុននឹងទទួលតំណែងនេះ លោកស្រី ហ្វេរ៉ូ មានបទពិសោធន៍ច្រើនតាមរយៈការងារជាងបីទសវត្សរ៍នៅតំបន់អឺរ៉ុប, អាមេរិក ឡាទីន និងការ៉ាអ៊ីប, អាហ្វ្រ៊ិក និងមជ្ឈិមបូព៌ា និងនៅអាស៊ីខាងត្បូង អមជាមួយតំណែងថ្នាក់ដឹកនាំជាន់ខ្ពស់មួយចំនួនទៀតនៅក្នុងស្ថាប័នធនាគារពិភពលោក។ តំណែងជាន់ខ្ពស់ដែលលោកស្រីធ្លាប់កាន់មុននេះគឺ ឋានៈអនុប្រធានទទួលបន្ទុកគោលនយោបាយប្រតិបត្តិការ និងកម្មវិធីតាមប្រទេស ដែលក្នុងនោះលោកស្រីជាអ្នកមើលការខុសត្រូវ លើអន្តរាគមន៍ឆ្លើយតបទ្រង់ទ្រាយធំបំផុតរបស់ធនាគារពិភពលោក ទៅនឹងការរាតត្បាតជំងឺកូវីដ១៩។ ក្នុងតំណែងជាប្រធានផ្នែកយុទ្ធសាស្ត្រនិងប្រតិបត្តិការសម្រាប់តំបន់អាមេរិក ឡាទីន លោកស្រី ហ្វេរ៉ូ ទទួលបន្ទុកមើលកិច្ចការប្រតិបត្តិការរបស់ធនាគារសម្រាប់តំបន់ធំមួយក្នុងចំណោមប្រទេស និងរដ្ឋមានចំណូលមធ្យម។ កាលនៅធ្វើជាប្រធានផ្នែកកាត់បន្ថយភាពក្រីក្រ និងគ្រប់គ្រងសេដ្ឋកិច្ច លោកស្រីជាអ្នកដឹកនាំកិច្ចសន្ទនាសេដ្ឋកិច្ចជាមួយបណ្តារដ្ឋក្នុងតំបន់មជ្ឈិមបូព៌ា និង អាហ្វ្រ៊ិកខាងជើង។
នៅក្នុងតំណែងថ្មីនេះ លោកស្រី ហ្វេរ៉ូ នឹងមើលការខុសត្រូវទូទៅលើការគាំទ្ររបស់ធនាគារពិភពលោកសម្រាប់តំបន់អាស៊ីបូព៌ា និងប៉ាស៊ីហ្វ៊ិក នៅក្នុងការស្តារសេដ្ឋកិច្ចឱ្យមានចីរភាព និងមានភាពស្វិតស្វាញឡើងវិញពីវិបត្តិដែលបង្កដោយកូវីដ១៩។ ពិតណាស់ ប្រទេសជាច្រើននៅក្នុងតំបន់នេះបានព្យាយាមទប់ស្កាត់ការរាលដាលជំងឺនេះប្រកបដោយជោគជ័យនៅក្នុងឆ្នាំ២០២០កន្លងទៅ ប៉ុន្តែរលកនៃការរាលដាលក្រោយមកទៀតរបស់វីរុសនេះ កំពុងតែធ្វើឱ្យកំណើនសេដ្ឋកិច្ចនិងការបង្កើតការងារមានសភាពថមថយ បណ្តាលឱ្យវិសមភាពកាន់តែរីកធំទៅវិញនៅក្នុងឆ្នាំ២០២១។
លោកស្រី Manuela V. Ferro, មានប្រសាសន៍ថា៖ “ធនាគារពិភពលោកជាដៃគូយូរអង្វែងនៅក្នុងតំបន់អាស៊ីបូព៌ា និងប៉ាស៊ីហ្វ៊ិក ហើយធនាគារនៅតែរក្សាការប្តេជ្ញាចិត្តជួយតំបន់នេះឱ្យរើបឡើងវិញនៅក្នុងពេលដ៏សែនលំបាកនេះ។ ក្នុងនាមជាអនុប្រធាននៃធនាគារនេះទទួលបន្ទុកតំបន់អាស៊ីបូព៌ា និងប៉ាស៊ីហ្វ៊ិក ខ្ញុំត្រៀមខ្លួនជាស្រេចដើម្បីពង្រឹងភាពជាដៃគូជាមួយបណ្តាប្រទេស និង ដៃគូអភិវឌ្ឍន៍នានា នៅក្នុងបេសកកម្មថ្មីនេះ។”
លោកស្រី ហ្វេរ៉ូ មានសញ្ញាបត្របណ្ឌិតផ្នែកអភិវឌ្ឍន៍សេដ្ឋកិច្ចពីសាកលវិទ្យាល័យ Stanford University និងសញ្ញាបត្រវិស្វកម្មមួយទៀតពីសាកលវិទ្យាល័យ Technical University of Lisbon ប្រទេសព័រទូហ្កាល់។ លោកស្រីមានកេរ្តិ៍ឈ្មោះលេចធ្លោដោយសារស្នាដៃការងារសំខាន់មួយចំនួន មានដូចជាភាពជាអ្នកដឹកនាំបែបយុទ្ធសាស្ត្ររបស់លោកស្រី, ការសម្រេចបានសមិទ្ធផលល្អៗក្នុងកម្មវិធីនៅតាមប្រទេស, និងប្រវត្តិស្នាដៃក្នុងការបង្កើតភាពជាដៃគូប្រកបដោយផ្លែផ្កាជាមួយបណ្តាប្រទេសជាអតិថិជន និងដៃគូអភិវឌ្ឍន៍នានា។
លោកស្រី ហ្វេរ៉ូ នឹងមើលលើការគ្រប់គ្រងទំនាក់ទំនងរបស់ធនាគារជាមួយប្រទេសចំនួន ២៦, បុគ្គលិកជាង ១ ០០០នាក់ និងផតហ្វូលីយោកម្មវិធី(កម្រងកម្មវីធី)ដែលមានទឹកប្រាក់សរុបប្រមាណជា ៤០ប៊ីលានដុល្លារអាមរិក សម្រាប់តំបន់អាស៊ីបូព៌ា និងប៉ាស៊ីហ្វ៊ិក ទាំងមូល។
វិធានការឆ្លើយតបរបស់ក្រុមធនាគារពិភពលោកចំពោះកូវីដ១៩៖
ចាប់តាំងពីមានការផ្ទុះការរាតត្បាតជំងឺកូវីដ១៩មក ក្រុមធនាគារពិភពលោកបានធ្វើអន្តរាគមន៍ឆ្លើយតបគិតជាទឹកប្រាក់អស់ជាង ១៥៧ប៊ីលានដុល្លារអាមេរិករួចហើយ ដើម្បីទប់ទល់ទៅនឹងផលប៉ះពាល់របស់ជំងឺនេះទៅលើផ្នែកសុខាភិបាល, សេដ្ឋកិច្ច និងសង្គម។ ការឆ្លើយតបនេះមានវិសាលភាពធំបំផុត និងល្បឿនលឿនបំផុតដែលមិនធ្លាប់មាននៅក្នុងប្រវត្តិរបស់ធនាគារទេ។ អន្តរាគមន៍ហិរញ្ញវត្ថុនេះកំពុងតែជួយដល់ប្រទេសចំនួនជាង ១០០ នៅជុំវិញពិភពលោក ឱ្យពង្រឹងសមត្ថភាពត្រៀមខ្លួនប្រយុទ្ធនឹងការរាតត្បាតជំងឺ, ការពារជនក្រីក្រ និងការងារ, និងចាប់ផ្តើមស្តារសេដ្ឋកិច្ចមកវិញតាមបែបមានមេត្រីជាមួយបរិស្ថាន។ លើសពីនេះ ធនាគារក៏កំពុងតែជួយដល់ប្រទេសមានចំណូលទាប និងចំណូលមធ្យមជាង៥០ប្រទេសផ្សេងទៀត ក្នុងនោះចំនួនជាងពាក់កណ្តាលស្ថិតនៅក្នុងទ្វីបអាហ្វ្រ៊ិក ក្នុងការទិញនិងបែងចែកវ៉ាក់សាំងការពារជំងឺកូវីដ១៩។ សម្រាប់បម្រើដល់គោលដៅនេះ ធនាគារបានត្រៀមជាស្រេចនូវហិរញ្ញប្បទានចំនួន ២០ប៊ីលានដុល្លារអាមេរិក រហូតដល់ចុងឆ្នាំ២០២១។
