ວຽງຈັນ, ວັນທີ 28 ເມສາ 2015 - ອີງຕາມບົດລາຍງານການຕິດຕາມເສດຖະກິດຂອງ ສປປ ລາວ ສະບັບຫຼ້າສຸດໂດຍ ທະນາຄານໂລກ ເຫັນວ່າ ເສດຖະກິດຂອງ ສປປ ລາວ ໄດ້ສືບຕໍ່ຂະຫຍາຍຕົວຢ່າງໄວວາ ໃນອັດຕາ 7,5% ໃນປີ 2014 ໂດຍການປະກອບສ່ວນຈາກກິດຈະກໍາທີ່ມີການຂະຫຍາຍຕົວຢ່າງເຂັ້ມແຂງເພື່ອຕອບສະໜອງຄວາມຕ້ອງການພາຍໃນປະເທດ ເປັນຕົ້ນແມ່ນກິດຈະກໍາທີ່ກ່ຽວກັບຂະແໜງກໍ່ສ້າງ, ປ່າໄມ້ແລະການບໍລິການ. ນອກຈາກນີ້, ບົດລາຍງານດັ່ງກ່າວຍັງໄດ້ກ່າວເຖິງນະໂຍບາຍແລະການປະຕິຮູບຕ່າງໆສຳລັບ ສປປ ລາວ ເພື່ອໃຫ້ສາມາດໄດ້ຮັບຜົນປະໂຫຍດ ຈາກການເຊື່ອມໂຍງໃນພາກພື້ນ ກໍ່ຄືການກ້າວເຂົ້າສູ່ປະຊາຄົມເສດຖະກິດອາຊຽນ (AEC). ບົດລາຍງານຍັງໄດ້ຊີ້ໃຫ້ເຫັນເຖິງຄວາມສຳຄັນໃນການສ້າງວຽກເຮັດງານທໍາທີ່ມີຜະລິດຕະພາບເພື່ອເຮັດໃຫ້ມີການເຕີບໂຕທີ່ມີຜົນປະໂຫຍດທົ່ວເຖິງ.
ບົດລາຍງານດັ່ງກ່າວຍັງໄດ້ຊີ້ໃຫ້ເຫັນຕື່ມອີກວ່າ ເສດຖະກິດລາວຈະຍັງສືບຕໍ່ຂະຫຍາຍຕົວເພີ່ມຂຶ້ນເລື້ອຍໆ ໃນລະດັບມະຫາພາກ ແຕ່ເສດຖະກິດຈະຍັງຄົງບອບບາງ. ໃນຂະນະທີ່ຄາດຄະເນວ່າ ການລົງທຶນໃນຂະແໜງພະລັງງານຈະຍັງສືບຕໍ່ເຂັ້ມແຂງຢູ່, ແຕ່ການເຕີບໂຕຂອງເສດຖະກິດໂດຍລວມ ຄາດວ່າຈະຊ້າລົງໃນອັດຕາ 6,4% ໃນປີ 2015 ເນື່ອງຈາກວ່າຜົນຜະລິດແຮ່ທາດໂດຍລວມຄາດວ່າຈະຢູ່ໃນລະດັບເກົ່າ, ຄວາມພະຍາຍາມໃນການຫຼຸດຜ່ອນ ການຂາດດຸນງົບປະມານ ແລະ ອັດຕາການເຕີບໂຕຂອງສິນເຊື່ອທີ່ຈະຫຼຸດລົງ.
ໃນທ່າມກາງຄວາມສ່ຽງຕໍ່ເສດຖະກິດມະຫາພາກຄືປະຈຸບັນ, ອັດຕາການເຕີບໂຕຂອງເສດຖະກິດທີ່ຫຼຸດລົງເລັກນ້ອຍຊົ່ວຄາວທີ່ຕິດພັນກັບການປະຕິບັດນະໂຍບາຍເພື່ອຫຼຸດຜ່ອນຄວາມສ່ຽງໃນດ້ານງົບປະມານແລະຂະແໜງການເງິນແມ່ນມີຄວາມຈໍາເປັນ.
ທ່ານ ນ. ແຊລີ ເບີນິງແຮມ, ຜູ້ຕາງໜ້າຫ້ອງການທະນາຄານໂລກ ປະຈໍາ ສປປ ລາວ ໄດ້ກ່າວວ່າ: “ຜ່ານມາລັດຖະບານໄດ້ມີບາດກ້າວໃນການຟື້ນຟູສະຖຽນລະພາບຂອງເສດຖະກິດມະຫາພາກ, ແຕ່ສິ່ງສໍາຄັນແມ່ນຈະຕ້ອງມີການສືບຕໍ່ຈັດຕັ້ງປະຕິບັດຢ່າງຕໍ່ເນື່ອງ”. “ໃນໄລຍະຍາວ, ການສ້າງແວດລ້ອມທຸລະກິດໃຫ້ມີຄວາມດຶງດູດ ແລະ ການສ້າງວຽກເຮັດງານທໍາທີ່ມີຜະລິດຕະພາບສູງກວ່າເກົ່າ ຈະຊ່ວຍສ້າງໂອກາດໃຫ້ປະເທດຊາດໄດ້ຮັບຜົນປະໂຫຍດຈາກການເຊື່ອມໂຍງເຂົ້າພາກພື້ນ ກໍ່ຄືການສ້າງຄວາມຜາສຸກ ແລະ ຫຼຸດຜ່ອນຄວາມທຸກຍາກໃຫ້ແກ່ປະຊາຊົນຢ່າງທົ່ວເຖິງ”.
ບົດລາຍງານດັ່ງກ່າວຍັງໄດ້ຄາດຄະເນອັດຕາການຂາດດຸນງົບປະມານ ວ່າຈະຫຼຸດລົງເລັກນ້ອຍໃນສົກປີ 2014-15 ມາເປັນ 4,2%, ເນື່ອງຈາກວ່າ ການປັບປຸງການເກັບລາຍຮັບຈະຊ່ວຍຊົດເຊີຍໃຫ້ແກ່ລາຍຮັບຈາກຂະແໜງຊັບພະຍາກອນທໍາມະຊາດທີ່ຈະຫຼຸດລົງ ແລະ ມີການຮັດກຸມທາງດ້ານການໃຊ້ຈ່າຍຫຼາຍຂຶ້ນ. ດ້ານໜີ້ສິນຂອງລັດ ຄາດວ່າຈະຢູ່ໃນອັດຕາ 60% ຂອງ GDP ໃນທ້າຍປີ 2014. ເຖິງແມ່ນວ່າການຂະຫຍາຍຕົວຂອງສິນເຊື່ອຈະຊ້າລົງກວ່າເກົ່າ ແຕ່ກໍ່ຍັງຄົງຈໍາເປັນຈະຕ້ອງມີການຕິດຕາມຂະແໜງການເງິນຢ່າງຕໍ່ເນື່ອງ ເພື່ອຮັກສາສະຖຽນລະພາບ.
ກ່ຽວກັບການກ້າວໄປສູ່ AEC, ບົດລາຍງານນີ້ ໄດ້ແນະນໍາໃຫ້ສ້າງແວດລ້ອມທຸລະກິດໃຫ້ມີຄວາມດຶງດູດ ແລະ ຮັບປະກັນໃຫ້ມີການຈັດຕັ້ງປະຕິບັດນະໂຍບາຍປະຕິຮູບຢ່າງປະມີສິດທິພາບ ເພື່ອຈະຊ່ວຍໃຫ້ສປປ ລາວ ສາມາດໄດ້ຮັບປະໂຫຍດຈາກການເພີ່ມທະວີການເຊື່ອມໂຍງໃນພາກພື້ນ. ໃນການເປັນສະມາຊິກ AEC, ປະເທດລາວ ຄາດວ່າຈະໄດ້ຮັບໂອກາດໃໝ່ໆ ທັງໃນດ້ານການລົງທຶນຈາກຕ່າງປະເທດ, ຕົ້ນທຶນການນໍາເຂົ້າທີ່ອາດຈະຫຼຸດລົງ ແລະ ການເຄື່ອນຍ້າຍແຮງງານໃນບາງອາຊີບທີ່ ສປປ ລາວ ຍັງຂາດແຄນຢູ່. ພ້ອມນີ້ ບົດລາຍງານດັ່ງກ່າວ ຍັງໄດ້ມີຂໍ້ແນະນໍາອີກວ່າ ເພື່ອສາມາດສ້າງວຽກເຮັດງານທໍາໃຫ້ຫຼາຍຂຶ້ນໄດ້ແມ່ນຄວນມີ ການສົ່ງເສີມການລົງທຶນຂອງພາກເອກະຊົນ ໃຫ້ມີຄວາມຫຼາກຫຼາຍ ເປັນຕົ້ນຂະແໜງກະສິກໍາ, ຂະແໜງປຸງແຕ່ງ ແລະ ບໍລິການ. ການສ້າງທັກສະທາງດ້ານວິຊາການທີ່ພົວພັນກັບສາຂາອາຊີບ ແລະ ສ້າງຄວາມເຂັ້ມແຂງໃຫ້ແກ່ການສຶກສາສໍາລັບເດັກນ້ອຍກ່ອນໄວຮຽນ ຈະຊ່ວຍຮັບປະກັນໃຫ້ກໍາລັງແຮງງານມີທັກສະທີ່ສອດຄ່ອງກັບຄວາມຕ້ອງການ ຊຶ່ງຈະຊ່ວຍສະໜອງກໍາລັງແຮງງານເຂົ້າໃນສາຂາອາຊີບທີ່ຍັງຕ້ອງການກໍາລັງແຮງງານຢູ່.
