ក្រុងវ៉ាស៊ីនតោន ថ្ងៃទី១៨ ខែមករា ឆ្នាំ២០២២ — ធនាគារពិភពលោក នៅថ្ងៃនេះ បានអនុម័តជំនួយហិរញ្ញប្បទានសរុបចំនួន ៦៩,២៥លានដុល្លារអាមេរិក ដែលក្នុងនោះមានអំណោយពីអង្គការ ភាពជាដៃគូសាកលដើម្បីការអប់រំ (Global Partnership for Education/GPE) ផង ដើម្បីជួយកម្ពុជាក្នុងការធ្វើឱ្យកាន់តែប្រសើរនូវលទ្ធភាពប្រកបដោយសមធម៌ក្នុងការទទួលបានការអប់រំជាមូលដ្ឋាន និង ក្នុងការឆ្លើយតបឱ្យបានរហ័សទៅនឹងវិបត្តិនានាដែលប៉ះពាល់ដល់ប្រព័ន្ធអប់រំក្នុងប្រទេស។
កញ្ចប់មូលនិធិថ្មីនេះរួមមានទឹកប្រាក់ចំនួន ៦០លានដុល្លារអាមេរិក ដែលធនាគារពិភពលោកនឹងផ្តល់ជាឥណទានតាមរយៈសមាគមអភិវឌ្ឍន៍អន្តរជាតិ (International Development Association/IDA) និងចំនួន ៩,២៥លានដុល្លារអាមេ រិកទៀត ដែលជាជំនួយឥតសំណងពីអង្គការ ភាពជាដៃគូសាកលដើម្បីការអប់រំ ។
ហិរញ្ញប្បទាននេះនឹងជួយទ្រទ្រង់ដល់គម្រោងកែលម្អការអប់រំទូទៅ General Education Improvement Project (GEIP) ដែលមានរយៈពេលប្រាំឆ្នាំ ជាមួយគោលបំណងជួយកម្ពុជាក្នុងការឈានទៅសម្រេចចក្ខុវិស័យនៃផែនការយុទ្ធសាស្ត្រនៃការអប់រំ ឆ្នាំ២០១៩-២០២៣ (Education Strategic Plan/ESP 2019-2023)។ ចក្ខុវិស័យនោះគឺឆ្ពោះទៅ “បង្កើត និង អភិវឌ្ឍធនធានមនុស្សប្រកបដោយគុណភាពខ្ពស់ និង សីលធម៌ល្អ ដើម្បីអភវិឌ្ឍឱ្យបានសង្គមមួយដែលមានចំណេះដឹងជាមូលដ្ឋាន”។ ដើម្បីឈានទៅសម្រេចកម្មវត្ថុនេះ រដ្ឋាភិបាលកម្ពុជាបានបង្ហាញការប្តេជ្ញាចិត្តលៃលករកដំណោះស្រាយដល់បញ្ហាប្រឈមធំពីរ គឺ ការរៀនចេះរបស់សិស្សនៅមានកម្រិតទាប និង វិសមធម៌ក្នុងលទ្ធភាពទទួលបានការអប់រំជាមូលដ្ឋាន ក្នុងនោះរួមមានការអប់រំសម្រាប់ក្មេងតូច, ការអប់រំកម្រិតបឋម និងការអប់រំកម្រិតមធ្យមសិក្សាចំណេះទូទៅ។
លោកស្រី ម៉ារីយ៉ាម សាលីម (Maryam Salim) ប្រធានគ្រប់គ្រងនៃធនាគារពិភពលោកប្រចាំប្រទេសកម្ពុជា មានប្រសាសន៍ដូច្នេះថា៖ “កម្ពុជាពិតជាបានសម្រេចសមិទ្ធផលធំៗច្រើននៅក្នុងការពង្រីកលទ្ធភាពទទួលបានការអប់រំ ប៉ុន្តែបញ្ហានៅបន្តមាននៅឡើយពាក់ព័ន្ធទៅនឹងលទ្ធភាពទទួលបានការអប់រំប្រកបដោយសមធម៌ ជាពិសេសសម្រាប់កុមារច្រើនក្រុម មានដូចជា កុមាររស់នៅតាមតំបន់ដាច់ស្រយាល, កុមារក្នុងគ្រួសារក្រីក្រ ឬ ក្នុងបណ្តាសហគមន៍ជនជាតិដើមភាគតិច និង កុមារមានពិការភាព។ ជាងនេះទៀត លទ្ធផលនៃការរៀនចេះរបស់សិស្សបានរងការប៉ះទង្គិចយ៉ាងខ្លាំងនៅពេលដែលសាលារៀនត្រូវបានបិទទ្វារយ៉ាងយូរ ដោយសារតែការរាតត្បាតនៃជំងឺកូវីដ-១៩”។ លោកស្រីមានប្រសាសន៍បន្ថែមទៀតថា៖ “យើងសង្ឃឹមយ៉ាងមុតមាំថា គម្រោងនេះនឹងរកដំណោះស្រាយដល់បញ្ហាប្រឈមទាំងនេះ និង ស្តារការអប់រំឱ្យកាន់តែមានភាពប្រសើរឡើងវិញថែមទៀត។”
លោកស្រី អាលីស អលប្រាយ (Alice P. Albright) នាយិកាប្រតិបត្តិនៃអង្គការ ភាពជាដៃគូសាកលដើម្បីការអប់រំ មានប្រសាសន៍ដូច្នេះថា៖ “ការផ្តល់ជំនួយហិរញ្ញវត្ថុនេះគឺចំពេលដ៏សំខាន់ ក្នុងខណៈដែលវីរុសបំប្លែងនៃកូវីដ-១៩ កំពុងបង្កផលប៉ះពាល់កាន់តែអាក្រក់ទៅលើប្រព័ន្ធអប់រំនៅទូទាំងពិភពលោក។ យើងសង្ឃឹមថា ជំនួយទាំងនេះនឹងជួយកម្ពុជាឱ្យបន្តពង្រីកលទ្ធភាពក្នុងការទទួលបានការអប់រំប្រកបដោយគុណភាព និង ធានាយ៉ាងណាឱ្យកុមារក្នុងក្រុមងាយរងគ្រោះបំផុតបានចូលសាលារៀន និង ទទួលចំណេះដឹង ផង។”
គម្រោងនេះមានសកម្មភាពធំៗ ដូចជា ការអនុវត្តកម្មវិធីគ្រប់គ្រងនៅតាមសាលារៀន, ការផ្តល់ការអភិវឌ្ឍសមត្ថភាពរបស់គ្រូបង្រៀន ថ្នាក់ដឹកនាំសាលា គ្រូបណ្តុះបណ្តាល និងបុគ្គលិកសិក្សា, និងការកែលម្អបរិយាកាសរៀនឱ្យប្រសើរឡើងថែមទៀត។ គម្រោងនេះមានការសាងសង់ និង ស្តារជួសជុលឡើងវិញនូវអគារសិក្សា, មន្ទីរពិសោធន៍វិទ្យាសាស្ត្រ, ស្ថាប័នបណ្តុះបណ្តាលគ្រូ និងសាលាអប់រំពិសេស ហើយនិងតម្រូវការទិញគ្រឿងបរិក្ខារបច្ចេកវិទ្យាសម្រាប់ការអប់រំ និងការជួយដល់សិស្សមានពិការភាព រាប់ទាំងការវាយតម្លៃលើសភាពនៃពិការភាពនីមួយៗផង។ ក្រៅពីនេះ គម្រោងនៅមានការសាកល្បងកម្មវិធីអប់រំបច្ចេកវិទ្យាមួយ (EdTech) សម្រាប់មុខវិជ្ជាគណិតសាស្ត្រ។
គោលដៅមួយក្នុងចំណោមគោលដៅនានារបស់គម្រោងនេះ គឺការកែលម្អឱ្យប្រសើរឡើងនូវការប្រតិបត្តិមុខងារទូទៅនៅក្នុងប្រព័ន្ធអប់រំទាំងមូល តាមរយៈការកសាងសមត្ថភាពជាតិសម្រាប់កម្មវិធីកែទម្រង់វិស័យអប់រំ, ការរៀបចំយុទ្ធសាស្ត្រឡើងវិញសម្រាប់អនុវិស័យ, និងការត្រួសត្រាយផ្លូវមួយឆ្ពោះទៅយកការបង្រៀនធ្វើជាអាជីព។ គម្រោងក៏មានគោលដៅមួយទៀតក្នុងការជួយសម្រួលដល់ការរៀបចំផែនការយុទ្ធសាស្ត្រនៃការអប់រំឆ្នាំ២០២៤-២០២៨ និងការរៀបចំឱ្យមាន “វេទិកាឧត្តមានុវត្ត” ប្រចាំឆ្នាំក្នុងវិស័យអប់រំផងដែរ។
អំពីធនាគារពិភពលោក
ធនាគារពិភពលោកផ្តល់ហិរញ្ញប្បទាន, ចំណេះដឹងជាសាកល និងការប្តេជ្ញាចិត្តរយៈពេលវែង ដើម្បីជួយប្រទេសមានចំណូលទាប និងមធ្យមក្នុងកិច្ចខិតខំបញ្ចប់ភាពក្រីក្រ, ឱ្យទទួលបានកំណើនប្រកបដោយចីរភាព និងវិនិយោគក្នុងការបង្កើតឱកាសសម្រាប់ពលរដ្ឋទាំងអស់គ្នា។ ធនាគារពិភពលោករួមមានធនាគារអន្តរជាតិសម្រាប់ការកសាងឡើងវិញ និងការអភិវឌ្ឍ (IBRD) ដែលជាធនាគារអភិវឌ្ឍន៍ដ៏ធំបំផុតរបស់ពិភពលោក និងសមាគមអភិវឌ្ឍន៍អន្តរជាតិ (IDA) ដែលជាប្រភពមូលនិធិដ៏ធំបំផុតមួយសម្រាប់ប្រទេសក្រីក្របំផុតរបស់ពិភពលោក។ រួមគ្នាជាមួយស្ថាប័នដទៃទៀតរបស់ធនាគារពិភពលោក ក៏ដូចជាដៃគូនានាក្នុងវិស័យសាធារណៈនិងឯកជន យើងកំពុងជួយក្នុងការរកដំណោះស្រាយដល់បញ្ហាប្រឈមជាសកលនៃសតវត្សរ៍ទី២១ នៅគ្រប់វិស័យសំខាន់ៗរបស់ការអភិវឌ្ឍ។ ពិភពលោកដែលគ្មាននរណាម្នាក់រស់នៅក្នុងភាពក្រីក្រ និងដែលមនុស្សគ្រប់រូបមានឱកាសជីវិតរស់នៅកាន់តែប្រសើរ នៅមិនឆ្ងាយពីចុងដៃរបស់យើងទេ។
អំពីភាពជាដៃគូសាកលសម្រាប់ការអប់រំ
អង្គការ ភាពជាដៃគូសាកលសម្រាប់ការអប់រំ តំណាងឱ្យការប្តេជ្ញាចិត្តរួមគ្នាឆ្ពោះទៅលុបបំបាត់វិបត្តិនានាក្នុងការអប់រំនៅលើពិភពលោក។ យើងធ្វើការកៀរគរដៃគូ និង មូលនិធិដើម្បីជួយដល់ប្រទេសមានចំណូលទាបចំនួន ៧៦ប្រទេស ក្នុងកិច្ចខិតខំប្រែក្លាយប្រព័ន្ធអប់រំរបស់ខ្លួនឱ្យផ្តល់ឱកាសសម្រាប់ក្មេងស្រី និង ក្មេងប្រុសគ្រប់រូប ដើម្បីពួកគេអាចទទួលបានការអប់រំប្រកបដោយគុណភាព ដែលពួកគេត្រូវការចាំបាច់ដើម្បីបញ្ចេញសក្តានុពលរៀងៗខ្លួនឱ្យបានពេញលេញ និង ដើម្បីរួមចំណែកដល់ការកសាងពិភពលោកមួយដែលកាន់តែមានភាពប្រសើរឡើងថែមទៀត។
