ລັດຖະບານແຫ່ງ ສປປ ລາວ ຈະເປີດປີທ່ອງທ່ຽວລາວ ປີ 2024 ເພື່ອ ສ້າງຄວາມສົນໃຈໃຫ້ນັກທ່ອງທ່ຽວ ເຂົ້າມາທ່ອງທ່ຽວໃນປະເທດ ຢ່າງໜ້ອຍ 4,6 ລ້ານຄົນ. ການເປີດປີທ່ອງທ່ຽວນີ້ ເປັນໂອກາດສຳຄັນຕໍ່ເສດຖະກິດລາວ ເພາະວ່າຂະແໝງການທ່ອງທ່ຽວກວມເອົາປະມານ 5% ຂອງລວມຍອດຜະລິດຕະພັນພາຍໃນປະເທດ (GDP). ໃນຄະນະດຽວກັນ, ທະນາຄານໂລກຄາດຄະເນໄວ້ວ່າ ການທ່ອງທ່ຽວລາວສາມາດເຕີບໂຕ ປະມານ 10% ຂອງ GDP ຖ້າມີການລົງທຶນ ແລະ ການປະຕິຮູບ ທີ່ຖືກຕ້ອງ.
ໂຄວິດ-19 ໄດ້ສ້າງຜົນກະທົບ ຕໍ່ອຸດສາຫະກຳການທ່ອງທ່ຽວທົ່ວໂລກ. ສິ່ງທ້າທາຍອັນສໍາຄັນ ທີ່ຂະແຫນງການທ່ອງທ່ຽວລາວ ກຳລັງປະເຊີນ ແມ່ນຂາດຂໍ້ມູນດ້ານການຕະຫຼາດ ເຊິ່ງກ່ຽວຂ້ອງກັບ ການປ່ຽນແປງຂອງຕະຫຼາດການທ່ອງທ່ຽວໂລກ. ຂໍ້ມູນດ້ານການຕະຫຼາດທ່ອງທ່ຽວ ເປັນບ່ອນອີງຈໍາເປັນ ແລະ ສໍາຄັນ ຕໍ່ ລັດຖະບານລາວໃນການ ປັບປຸງຍຸດທະສາດ ການຕະຫຼາດ, ຜະລິດຕະພັນ ແລະ ມາດຕະຖານການບໍລິການ ທ່ອງທ່ຽວ ທີ່ສາມາດ ຕອບສະໜອງຄວາມຕ້ອງການຂອງນັກທ່ອງທ່ຽວ ຈາກຕະຫຼາດການທ່ອງທ່ຽວທີ່ແຕກຕ່າງກັນ.