ធនាគារពិភពលោកតែងតាំងប្រធានគ្រប់គ្រងថ្មីប្រចាំនៅកម្ពុជា

ភ្នំពេញ ថ្ងៃទី៩ ខែសីហា ឆ្នាំ២០២១— ធនាគារពិភពលោកបានតែងតាំងលោកស្រី ម៉ារីយ៉ាម សាលីម (Maryam Salim) ជាប្រធានគ្រប់គ្រងថ្មី​ប្រចាំនៅប្រទេសកម្ពុជា ស្នងតំណែងពីលោកស្រី អ៊ីងហ្គូណា ដូប្រាចា(Inguna Dobraja) ដែលបានផ្លាស់ទៅធ្វើការថ្មីនៅប្រទេសម៉ុលដូវ៉ាក្រោយពីបានបំពេញបេសសកម្មអស់រយៈពេលប្រាំឆ្នាំជាប្រធានគ្រប់គ្រង​​ការិយាល័យនៃធនាគារពិភពលោកនៅក្នុងរាជធានីភ្នំពេញ។ លោកស្រី សាលីម មើលការខុសត្រូវរួមពីលើកិច្ចការប្រចាំថ្ងៃរបស់ធនាគារពិភពលោកជាមួយ​រដ្ឋា​ភិបាល និង​ដៃគូអភិវឌ្ឍន៍ ក្នុងនោះមានកញ្ចប់​គម្រោងនានាគិតជាតម្លៃទឹកប្រាក់សរុបប្រមាណ ១,១ប៊ីលានដុល្លារអាមេរិក (US$1.1 billion) ដែលភ្នាក់​ងារនានារបស់រដ្ឋា​ភិបាល​កំពុងអនុវត្ត តាមរយៈជំនួយហិរញ្ញវត្ថុ និង​បច្ចេកទេសពីធនាគារពិភពលោក។ គម្រោងទាំងនោះ​ត្រូវ​បានរៀបចំតម្រូវតាមអាទិភាពអភិវឌ្ឍន៍របស់កម្ពុជា អមដោយគោលដៅពីររបស់ធនាគារពិភពលោក គឺ​ដើម្បី​កាត់​បន្ថយ​ភាព​ក្រី​ក្រ និង​បង្កើន​វិបុលភាព​រួមសម្រាប់ប្រជាជនកម្ពុជា។ ក្របខណ្ឌភាពជាដៃគូរបស់ធនាគាពិភពលោកសម្រាប់ប្រទេសកម្ពុជាសម្រាប់ដំណាក់កាលឆ្នាំ ២០១៩-២០២៣ ផ្តោត​សំខាន់​ទៅលើ​ការបង្កើន​ភាពប្រសិទ្ធភាពរបស់​វិស័យសាធារណៈ និងលើកកម្ពស់​ការ​អភិវឌ្ឍវិស័យឯកជន, លើការវិនិយោគ​លើធនធានមនុស្ស​តាមរយៈការពង្រីកលទ្ធភាពទទួលបាន​សេវា​អប់​រំ និង​សេវា​សុខាភិបាល​មាន​គុណ​ភាពសម្រាប់ក្មេងតូច, លើ​ការ​ធ្វើ​ពិពិធកម្ម​ និង​បង្កើន​ផលិតភាពក្នុងវិស័យកសិកម្ម, លើ​ការ​លើកកម្ពស់​ការ​ប្រើ​ប្រាស់​ធន​ធាន​ធម្ម​ជាតិ​ប្រក​ប​ដោយ​ចីរភាព និង​លើ​ការ​ពង្រឹង​អភិបាលកិច្ច ស្ថាប័ន និង​ការ​ចូលរួម​របស់​ពលរដ្ឋ។ លោកស្រី​ ម៉ារីយ៉ាម សាលីម ប្រធានគ្រប់គ្រងថ្មី​របស់​ធនាគាពិភពលោកប្រចាំនៅកម្ពុជា មាន​ប្រសាសន៍ថា៖ “ខ្ញុំមាន សោមនស្ស​ក្រៃលែងដែលបានមកកាន់តំណែងថ្មីនេះ ហើយ​ខ្ញុំកាន់តែរីករាយណាស់ដែរដែលបានត្រឡប់មកកម្ពុជាវិញ នៅ​១៧ឆ្នាំក្រោយគិតចាប់​ពីពេលដែលខ្ញុំបានបញ្ចប់ការងារនៅកម្ពុជា ក្នុង​នាម​ជា​ប្រធានក្រុម​នៃគម្រោងពាក់​ព័ន្ធ​មូល​និធិសង្គម​សម្រាប់​ពង្រឹងសហគមន៍ និង​ប្រយុទ្ធនឹងភាពក្រីក្រ”។ លោកស្រីមានពោលបន្ថែមទៀតថា៖ “ខ្ញុំត្រៀមខ្លួន​ជា​ស្រេចនឹងធ្វើការជាមួយសហសេវិកកម្ពុជា​របស់​ខ្ញុំ ដើម្បី​ជួយ​ប្រទេសកម្ពុជាគ្រប់​គ្រង​ផល​ប៉ះពាល់​នៃការ​រាត​ត្បាតជំងឺកូវីដ-១៩, រៀបចំមូលដ្ឋាន​សម្រាប់​ការ​ស្តារសេដ្ឋកិច្ច​ឱ្យរើបឡើងវិញយ៉ាងស្វាហាប់ និង​កសាងភាពធន់សម្រាប់​ទប់ទល់​ជាមួយហេតុការណ៍អង្រួនកន្ត្រាក់សេដ្ឋកិច្ច​នៅថ្ងៃខាងមុខ។” លោកស្រី​ សាលីម មានបទពិសោធន៍ការងារជាង២០ឆ្នាំ ក្នុងធនាគារពិភពលោក ក្នុងនោះកាលពីពេលថ្មីនេះលោកស្រី​ធ្លាប់កាន់​តំណែង​ជា​ប្រធាន​គ្រប់​គ្រង​ប្រចាំប្រទេស​អាល់បានី ផងដែរ។ កាល​នៅកម្ពុជាពេលមុន លោកស្រី​ជា​អ្នក​ឯកទេស​ផ្នែកអភិវឌ្ឍ​សង្គម និង​ធនធានមនុស្ស មុននឹងលោកស្រីបន្តទៅបំពេញមុខងារ​ក្នុង​តំណែងជាន់ខ្ពស់ផ្សេងៗនៅក្នុង​ផ្នែករៀបចំគោលនយោបាយ​ប្រតិបត្តិការ​របស់​ធនាគារពិភពលោក នៅស្នាក់ការកណ្តាលក្នុង​រដ្ឋធានីវ៉ាស៊ីនតោន សហរដ្ឋ​អាមេរិក។ លោកស្រី​មានដើមកំណើតនៅប្រទេសតង់ហ្សានី មានសញ្ញាបត្រអនុបណ្ឌិត​ផ្នែកសេដ្ឋកិច្ច​និង​ទំនាក់​ទំនង​អន្តរជាតិ​ពី​សកលវិទ្យាល័យ Johns Hopkins, និងជាបណ្ឌិតច្បាប់ចេញពីសកលវិទ្យាល័យ Georgetown។

About The World Bank

The World Bank Group has a bold vision: to create a world free of poverty on a livable planet. In more than 100 countries, the World Bank Group provides financing, advice, and innovative solutions that improve lives by creating jobs, strengthening economic growth, and confronting the most urgent global challenges. For more information, please visit www.worldbank.org, www.miga.org, and www.ifc.org.