អ្នកស្រាវជ្រាវនៅកម្ពុជាទទួលរង្វាន់សម្រាប់វិធីសាស្ត្របែបនវានុវត្តន៍ក្នុងការជួយទប់ស្កាត់ និងឆ្លើយតបទៅនឹងអំពើហិង្សាខាងយេនឌ័រ

ភ្នំពេញ ថ្ងៃទី៩ ខែកក្កដា ឆ្នាំ២០២០ — អ្នកស្រាវជ្រាវមួយក្រុមមកពី មជ្ឈមណ្ឌលស្រាវជ្រាវសុខភាពប្រជាជនអង្គការខាណា(KHANA Center for Population Health Research) មានជោគជ័យទទួលរង្វាន់មូលនិធិសម្រាប់យកទៅដាក់ឱ្យប្រតិបត្តិការនូវបណ្តាញឈែតលើអាប់​ ​WhatsApp មួយ សម្រាប់​ត្រៀមឆ្លើយតបពេញមួយថ្ងៃ២៤ម៉ោង ទៅ​នឹង​អំពើហិង្សាខាងយេនឌ័រ និង​ជួយ​ដល់​និយោជិកនារីដែលធ្វើការនៅតាមឧស្សាហកម្ម​កម្សាន្ត។ ក្រុមធនាគារពិភពលោក និង​អង្គការស្រាវជ្រាវអំពើហិង្សាខាងផ្លូវភេទ (Sexual Violence Research Initiative/SVRI) ប្រកាស​រួមគ្នាអំពីរង្វាន់នេះ នៅថ្ងៃនេះ។

រង្វាន់របស់កម្មវិធីដែលមានឈ្មោះថា ទីផ្សារអភិវឌ្ឍន៍ឆ្នាំ២០២០៖ នវានុវត្តភាពសម្រាប់ឆ្លើយតបអំពើហិង្សាទាក់ទងយេនឌ័រ (The 2020 Development Marketplace: Innovations to Address Gender-Based Violence award) នឹងជួយបង្កលទ្ធភាពឱ្យអ្នកស្រាវជ្រាវនៅអង្គការខាណាធ្វើ​តេស្តបណ្តាញឈែតមួយឈ្មោះថា ‘SMARTgirl Chatline’ ដែលផ្តល់សេវាគាំទ្រ ២៤ម៉ោងតាមរយៈ​អាប់​ ​WhatsApp ដល់ស្ត្រីធ្វើការនៅតាមឧស្សាហកម្ម​កម្សាន្ត ដែល​ប្រឈមនឹងហានិភ័យ ឬ​ដែលរស់រានឆ្លងផុតពីអំពើហិង្សា​ទាក់ទងយេនឌ័រ។

លោកស្រី អ៊ីនហ្គូណា ដូប្រាចា ប្រធានគ្រប់គ្រងនៃធនាគារពិភពលោកប្រចាំកម្ពុជា មានប្រសាសន៍ថា៖ «សមភាពយេនឌ័រ​គឺ​ជា​អាទិភាពខ្ពស់មួយ​សម្រាប់​ធនាគារពិភពលោកប្រចាំនៅកម្ពុជា ហើយ​វា​ត្រូវ​បាន​ឆ្លុះបញ្ចាំងជាប្រធានបទរឹងមាំមួយ​នៅ​ក្នុង​ក្របខណ្ឌ​ភាពជាដៃគូប្រចាំប្រទេសរបស់យើង។ គម្រោងរបស់អង្គការខាណា គឺ​ជា​កិច្ចខិតខំដ៏មានសារៈសំខាន់មួយ​សម្រាប់រក មធ្យោបាយជួយឱ្យនារីនិយោជិកទាំងនោះមានសុវត្ថិភាព ជាពិសេស​ អ្នកទាំងឡាយដែលប្រឈមនឹងហានិភ័យខ្ពស់មែនទែន។»

កម្មវិធីរង្វាន់​ ​ Development Marketplace ដែលទទួលបានការគាំទ្រហិរញ្ញវត្ថុពីធនាគារពិភពលោក​និង​អង្គការ SVRI គឺជាព្រឹត្តិការណ៍ប្រកួតប្រជែងជាលក្ខណៈសាកលធ្វើឡើងជារៀងរាល់ឆ្នាំ ដើម្បី​ស្វែងរកដំណោះស្រាយបែបនវានុវត្តន៍ សម្រាប់ជួយ​បុគ្គល សហគមន៍ និង​ប្រជាជាតិ​ក្នុងការទប់ស្កាត់​ និង​ឆ្លើយតបទៅនឹង​អំពើហិង្សាទាក់ទងយេនឌ័រ។

នៅក្នុងកំឡុងពេលមានការរាលដាលជំងឺកូវីដ១៩ទូទាំងសកលលោក មាន​ភស្តុតាងលេចឡើងបង្ហាញថាអំពើ​ហិង្សាទៅលើស្ត្រី​និង​ក្មេងស្រី ជា​ពិសេស​អំពើហិង្សាក្នុងគ្រួសារ បានកើនឡើងច្រើននៅជុំវិញពិភពលោកដោយសារតែការឃាំងខ្លួនក្នុងផ្ទះដើម្បីបង្ការការឆ្លងមេរោគ និង​ដោយសារការ​ខ្វះលទ្ធភាពទទួល​បាន​សេវានានា​ក្នុងពេលនេះ។ អង្គការសុខភាពពិភពលោកបាន​ប៉ាន់​ប្រមាណថា នារី ១​ នាក់ ក្នុងចំណោម ៣នាក់ បាន​រង​អំពីហិង្សាខាងផ្លូវភេទពីសំណាក់​ដៃគូ ឬមិន​មែនដៃគូ នៅក្នុងមួយជីវិត​របស់​ពួកគេ។ អ្នក​ស្រាវជ្រាវច្រើននាក់ទៀត​បាន​រកឃើញថា ទំនៀមទម្លាប់យេនឌ័រច្រើនតែជាឫសគល់នៃ​អំពី​ហិង្សា​ខាងយេនឌ័រ ហើយ​ការធ្វើឱ្យឥរិយាបថសហគមន៍​ផ្លាស់ប្តូរជាកិច្ចការមួយសំខាន់ណាស់​ដើម្បីជួយ​ទប់ស្កាត់អំពើហិង្សា​ទៅលើ​ស្ត្រី និង​ក្មេងស្រី។

លោកស្រី ការ៉ិន ហ្គ្រោន នាយកផ្នែកយេនឌ័រសាកលលោក​នៃក្រុមធនាគារពិភពលោក មានប្រសាសន៍ថា៖ «ផលប៉ះទង្គិចរបស់​អពើហិង្សាខាងយេនឌ័រ​មិនមែនមានត្រឹមតែពេលមានការវាយដំទៅលើជនរងគ្រោះភ្លាមៗនោះទេ តែវា​នៅដិតដាមជាមួយពួកគេយូរ​តទៅទៀត ក្នុងនោះមានការប៉ះទង្គិចផ្នែកសុខភាព ការអវត្តមានញឹកញាប់ ​ការ​បាត់បង់ផលិតភាព​នៅកន្លែងធ្វើការ ការ​បាត់បង់ចំណូលសម្រាប់គ្រួសារ និង​ឥទ្ធិពលមិនល្អវែងឆ្ងាយទៀតទៅលើមនុស្សជំនាន់ក្រោយ»។ លោកស្រីថ្លែងបន្ថែមទៀតថា៖ «តាមរយៈរង្វាន់នៃកម្មវិធី Development Marketplace នេះ អ្នក​ស្រាវជ្រាវ​ច្រើននាក់នៅជុំវិញពិភពលោក បាននិងកំពុងជួយ​បង្កើនល្បឿន​នៃការខិតខំ​ទប់ស្កាត់​ និង​ឆ្លើយតបទៅនឹងអំពើហិង្សា​ខាងយេនឌ័រ ឱ្យកាន់តែមានប្រសិទ្ធភាពថែមទៀត។»

លោកស្រី អេលីហ្សាបិត ដាតណាល់ នាយកប្រតិបត្តិនៃអង្គការ Sexual Violence Research Initiative ថ្លែងថា៖ «ការស្រាវជ្រាវ​ និង​សកម្មភាពនានាដែលចេញពីលទ្ធផលនៃការស្រាវជ្រាវ មានសារៈសំខាន់សម្រាប់ការស្វែងយល់អំពី​កត្តានានា​នៅ​ពីក្រោយ​អំពើហិង្សានិង​បរិបទ​នៅជុំវិញដែលចេះតែធ្វើ​ឱ្យមានកត្តាទំាងនោះ​ ដើម្បី​ឈានទៅរកឱ្យឃើញនូវវិធី​សម្រាប់យើង​ប្រើ​ក្នុងការនាំមកនូវការប្រែប្រួល​បន្តិចម្តងៗនៅក្នុងឥរិយាបថសង្គម ដើម្បីឈានទៅបញ្ចប់​អំពើហិង្សាទៅលើ​ស្រ្តី និង​កុមារ។»

នៅ​ក្នុងរយៈពេលបួនឆ្នាំចុងក្រោយនេះ ក្រុមធនាគារពិភពលោក និង​អង្គការ SVRI បាន​ប្រគល់រង្វាន់គិតជាទឹកប្រាក់ ៥លានដុល្លារអាមេរិកដល់គម្រោង​ស្រាវជ្រាវចំនួន​ ៥០គម្រោង នៅ​តាមប្រទេស​មានប្រាក់ចំណូលទាប​និង​មធ្យម​ជាង​ ៣២​ប្រទេស។ កម្មវិធីរង្វាន់ Development Marketplace ត្រូវ​បាន​រៀបចំធ្វើឡើងដើម្បីឧទ្ទិសជាការចងចាំដល់​ជនរងគ្រោះទាំងអស់ពីអំពើហិង្សា​ខាងយេនឌ័រ រាប់ទាំង​នាង ហាណ្ណា ហ្គ្រាម ផង ដែលជាកូនស្រីរបស់​បុគ្គលិកយូរឆ្នាំមួយរូបនៃក្រុមធនាគារពិភពលោក។

ឆ្នាំនេះ រង្វាន់ Development Marketplace នឹងជួយគាំទ្រដល់អ្នកស្រាវជ្រាវនៅប្រទេស បូលីវី, ប្រេស៊ីល, កម្ពុជា, ឥណ្ឌា,​ ហ្សកដង់, ស៊ែរប៊ី, អាហ្វ្រ៊ិក​ខាង​ត្បូង, វៀតណាម និង​ក្រុមមួយទៀតដែលនឹងធ្វើការស្រាវជ្រាវលំដាប់សកល។

About The World Bank

The World Bank Group has a bold vision: to create a world free of poverty on a livable planet. In more than 100 countries, the World Bank Group provides financing, advice, and innovative solutions that improve lives by creating jobs, strengthening economic growth, and confronting the most urgent global challenges. For more information, please visit www.worldbank.org, www.miga.org, and www.ifc.org.