ນະຄອນຫຼວງວຽງຈັນ, ວັນທີ 4 ເມສາ, 2019 – ສະພາບໍລິຫານຂອງທະນາຄານໂລກ ໄດ້ອະນຸມັດເງີນຈຳນວນ 50 ລ້ານ ໂດລາສະຫະລັດ ຈາກກອງທືນພິເສດ ເພື່ອການຊ່ວຍເຫຼືອເຫດການທີ່ເປັນວິກິດການເພີ່ມໃສ່ສອງໂຄງການ ທີ່ກຳລັງໃຫ້ການຊ່ວຍເຫຼືອ ສປປ ລາວ ໃນການພັດທະນາພື້ນຖານໂຄງລ່າງໃຫ້ມີຄວາມຄົງທົນ ແລະ ສາມາດຮັບມື ກັບການປ່ຽນແປງຂອງສະພາບດິນຟ້າອາກາດໃນເຂດທີ່ຖືກກະທົບຈາກໄພນ້ຳຖ້ວມ.
ທ່ານ ປອ. ບຸນຈັນ ສິນທະວົງ, ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ກ່າວວ່າ: “ທຸກພາກຂອງປະເທດຂອງພວກຂ້າພະເຈົ້າໄດ້ຮັບຜົນກະທົບຢ່າງໜັກໜ່ວງຈາກໄພນ້ຳຖ້ວມໃນປີກາຍນີ້ ເຊິ່ງໄດ້ເຮັດໃຫ້ມີການສູນເສຍຊີວິດ, ຊັບສິນ, ມີຜົນກະທົບຕໍ່ການດຳລົງຊີວິດ ແລະ ສ້າງຄວາມເສຍຫາຍຢ່າງຫລວງຫລາຍຕໍ່ພື້ນຖານໂຄງລ່າງຂອງລັດ,” ທ່ານ ປອ. ບຸນຈັນ ສິນທະວົງ, ຍັງໄດ້ກ່າວຕື່ມວ່າ: “ການຟຶ້ນຟູຄວາມເສຍຫາຍຈາກໄພພິບັດ ແລະ ການກໍ່ສ້າງຄືນໃໝ່ແມ່ນຕ້ອງການທືນ ຫລາຍກວ່າ 520 ລ້ານ ໂດລາສະຫະລັດ. ການສະໜັບສະໜູນດ້ານການເງິນເພີ່ມຈາກທະນາຄານໂລກນີ້ຈະຊ່ວຍພວກຂ້າພະເຈົ້າ ໃນການຟື້ນຟູບັນດາເສັ້ນທາງທີ່ຖືກເປ່ເພ, ແລະ ການປັບປຸງຕາຝັ່ງຕາມລຳແມ່ນ້ຳ ເພີ່ອປ້ອງກັນນ້ຳຖ້ວມ ໃຫ້ມີຄວາມທົນທານກວ່າເກົ່າ. ”
ຝົນຕົກໜັກແບບຜິດປົກກະຕິ ໃນລະດູຝົນປີ 2018 ໄດ້ສ້າງຄວາມເສຍຫາຍ ແລະ ສົ່ງຜົນກະທົບຕໍ່ປະຊາຊົນຫລາຍກວ່າ 616,000 ຄົນ ແລະ ມີຜູ້ເສຍຊີວິດ 56 ຄົນ. ພາຍຸເຂດຮ້ອນໃນເດືອນກໍລະກົດ ທີ່ມີຊື່ວ່າ ພາຍຸເຊິນຕິນ ແລະ ພະຍຸເບບິນກາ ໃນເດືອນສິງຫາໄດ້ພາໃຫ້ເກີດນ້ຳຖ້ວມໃນຫຼາຍພື້ນທີ່ໃນທົ່ວປະເທດ. ພາກໃຕ້ຂອງ ສປປ ລາວ ຍັງໄດ້ຮັບຜົນກະທົບຕື່ມອີກຍ້ອນເຂື່ອນໄຟຟ້າເຊປຽນ-ເຊນ້ຳນ້ອຍເພພັງ ໃນເດືອນກໍລະກົດ. ການປະເມີນຜົນຄວາມຕ້ອງການຫລັງໄພພິບັດທີ່ນຳພາໂດຍລັດຖະບານໄດ້ປະເມີນມູນຄ່າຂອງຄວາມເສຍຫາຍ ຄວາມສູນເສຍທາງດ້ານເສດຖະກິດ, ຄວາມຕ້ອງການໃນການຟື້ນຟູຄືນໃໝ່ ແລະ ຜົນກະທົບລວມຕໍ່ເສດຖະກິດຂອງ ສປປ ລາວ. ຄວາມຕ້ອງການລວມທັງໝົດເພື່ອການຟື້ນຟູຄືນຈາກໄພພິບັດໄດ້ຖືກປະເມີນເປັນມູນຄ່າປະມານ 520.4 ລ້ານ ໂດລາສະຫະລັດ.
ທ່ານ ນິໂກລາ ພອນທາຣາ, ຫົວໜ້າຫ້ອງການທະນາຄານໂລກປະຈຳ ສປປ ລາວ ໄດ້ກ່າວວ່າ: “ກອງທຶນຕອບໂຕ້ວິກິດການຂອງ IDA ແມ່ນກອງທຶນພິເສດອັນໜຶ່ງສ້າງຂື້ນມາເພືຶ່ອຊ່ວຍເຫຼືອ ບັນດາປະເທດທີ່ຖືກເຄາະຮ້າຍຈາກໄພພິບັດຢ່າງຮ້າຍແຮງ,” ທ່ານຍັງກ່າວຕື່ມວ່າ: “ມູນຄ່າຄວາມເສຍຫາຍ ແລະ ຄວາມສູນເສຍທາງດ້ານເສດຖະກິດ ເນື່ອງຈາກໄພນ້ຳຖ້ວມປີກາຍນີ້ແມ່ນສູງຫລາຍທີ່ສຸດທຽບໃສ່ມູນຄ່າເສຍຫາຍໃນປີຜ່ານມາ ລວມທັງພາຍຸໄຮມາ ແລະ ພາຍຸນົກເຕັນ ໃນປີ 2011, ແລະ ພາຍຸໄຊໂຄລນເກດສະນາ ໃນປີ 2009. ການສະໜັບສະໜູນດ້ານການເງິນເພີ່ມເຕີມນີ້ຈະສາມາດຊ່ວຍຟື້ນຟູໃຫ້ພື້ນຖານໂຄງລ່າງທີ່ຖືກເສຍຫາຍ ແລະ ໃຫ້ມີຄວາມທົນທານຫລາຍຂຶ້ນຕໍ່ໄພພິບັດໃນອະນາຄົດ.”
ໂຄງການຂະແໜງຂົວ-ທາງ II ຂອງລາວ ຈະໄດ້ຮັບທຶນເພີ່ມເຕີມ 25 ລ້ານໂດລາສະຫະລັດ ເພື່ອໃຊ້ເຂົ້າໃນການສ້ອມແປງບັນດາເສັ້ນທາງທີ່ເປ່ເພ ເຊິ່ງຈັດຕັ້ງປະຕິບັດໂດຍກົມຂົວທາງ. ບັນດາຊ່ວງທາງທີສຳຄັນຂອງເສັ້ນທາງຫລວງແຫ່ງຊາດເລກທີ 13 ໃຕ້ ຈະໄດ້ຖືກຟື້ນຟູຄືນໃໝ່ ເພື່ອໃຫ້ມີຄວາມທົນທານຕໍ່ສະພາບດິນຟ້າອາກາດ ແລະ ຮັບການການບຳລຸງຮັກສາທີ່ມີປະສິດທິພາບຫລາຍກວ່າເກົ່າໂດຍການນໍາໃຊ້ສັນຍາມອບເໝົາ ແລະ ການຊຳລະແມ່ນອີ່ງໃສ່ຄຸນນະພາບຂອງເສັ້ນທາງ ແລະ ຄວາມສາມາດໃນການບໍລິການນຳໃຊ້ຂອງມັນ ການປັບປຸງເສັ້ນທາງຈະແນໃສ່ການຫລຸດຜ່ອນຜົນກະທົບທີ່ເພີ່ມຂຶ້ນຈາກການປ່ຽນແປງດິນຟ້າອາກາດໂດຍ ເອົາໃຈໃສ່ເປັນພິເສດໃນການອອກແບບເສັ້ນທາງ, ເປັນຕົ້ນແມ່ນການປັບປຸງ ແລະ ຍົກລະດັບຊ່ວງທາງໃນເຂດທີ່ມີຄວາມສ່ຽງຕໍ່ນ້ຳຖ້ວມ, ປັບປຸງລະບົບລະບາຍນ້ຳຝົນ ແລະ ການປູກພືດພັນເພື່ອປ້ອງກັນການເຊາະເຈື່ອນ, ການປັບປຸງທໍ່ລະບາຍນ້ຳຂ້າມທາງ ແລະ ໜ້າທາງຈຸດເຂົ້າຂົວ.
ໂຄງການຄຸ້ມຄອງໄພພິບັດເອເຊຍຕາເວັນອອກສ່ຽງໃຕ້ຂອງ ສປປ ລາວ ຈະໄດ້ຮັບທຶນເພີ່ມເຕີມ 25 ລ້ານໂດລາສະຫະລັດ ເພື່ອສະໜັບສະໜູນການຟື້ນຟູຕາຝັ່ງກັນເຈື່ອນທີ່ຈັດຕັ້ງປະຕິບັດໂດຍກົມຂົນສົ່ງທາງນ້ຳ. ພື້ນຖານໂຄງລ່າງບຸລິມະສິດຂອງທາງນ້ຳຈະຖືກຍົກລະດັບໃຫ້ໄດ້ມາດຕະຖານທາງເຕັກນິກທີ່ດີເພື່ອປ້ອງກັນນ້ຳຖ້ວມ. ທຶນເພີ່ມເຕີມນິີ້ຍັງຈະໄດ້ມີການນໍາໃຊ້ເພື່ອປັບປຸງການຄຸ້ມຄອງຄວາມສ່ຽງໄພນ້ຳຖ້ວມໃນຕົວເມືອງແບບປະສົມປະສານ, ປັບປຸງສະພາບແວດລ້ອມໃນຕົວເມືອງໃຫ້ປອດໄພ ແລະ ສວຍງາມໂດຍມີການປ້ອງກັນນ້ຳຖ້ວມ ແລະ ການວາງແຜນຕົວເມືອງທີ່ມີຄວາມທົນທານ. ທາງໂຄງການຍັງຈະໄດ້ມີການສຶກສາເພີ່ມເຕີມກ່ຽວກັບການມີສ່ວນຮ່ວມຂອງພາກສ່ວນເອກະຊົນໃນການສະໜັບສະໜູນດ້ານການເງິນສຳລັບການພັດທະນາພື້ນຖານໂຄງລ່າງທີ່ມີຄວາມທົນທານຕໍ່ກັບສະພາບດິນຟ້າອາກາດ.
ຫລັງຈາກໄພນ້ຳຖ້ວມໃນປີ 2018 ທະນາຄານໂລກໄດ້ດັດແກ້ງົບປະມານໂຄງການຂະແໜງຂົວ-ທາງ II ເພື່ອໃຫ້ສາມາດນຳໃຊ້ເງິນຈຳນວນໜຶ່ງເພື່ອມາເຮັດວຽກສ້ອມແປງສຸກເສີນໃນບັນດາຊ່ວງທາງທີ່ເປ່ເພ. ທະນາຄານໂລກຍັງໄດ້ສະໜັບສະໜູນ ສປປ ລາວ ໃນການເຂົ້າຮ່ວມກອງທຶນປະກັນໄພຄວາມສ່ຽງຈາກໄພພິບັດເອເຊຍຕາເວັນອອກສ່ຽງໃຕ້ ແລະ ກຳລັງຊ່ວຍເຫລືອກະຊວງພະລັງງານ ແລະ ບໍ່ແຮ່ ເພື່ອຊຸກຍຸ້ບັນດາຄູ່ຮ່ວມງານໃຫ້ທົບທວນຄືນ ແລະກວດກາຄວາມປອດໄພຂອງເຂື່ອນໄຟຟ້າໃນລະດັບທົ່ວປະເທດ.
