- add-style
- font-medium
- lp-body-content
ដោះស្រាយបញ្ហាធ្លាក់ចុះផលិតភាពជាគន្លឹះសម្រាប់កំណើនរយៈពេលវែង
ក្រុងវ៉ាស៊ីនតោន, ថ្ងៃទី៣១ ខែមីនា ឆ្នាំ២០២៤៖ ប្រទេសកំពុងអភិវឌ្ឍន៍ក្នុងតំបន់អាស៊ីបូព៌ា និងប៉ាស៊ីហ្វិក កំពុងមានកំណើនសេដ្ឋកិច្ចលឿនជាងប្រទេសដទៃទៀតក្នុងពិភពលោក ប៉ុន្តែយឺតជាងនៅមុនពេលមានជំងឺរាតត្បាតសកល -- ធនាគារពិភពលោកបាននិយាយដូច្នេះ នៅថ្ងៃអាទិត្យនេះ តាមរយៈរបាយការណ៍ចុងក្រោយមួយស្តីពីទស្សនវិស័យសេដ្ឋកិច្ចក្នុងតំបន់។ ប៉ុន្តែធនាគារនេះបានបន្ថែមទៀតថា ខណៈដែលការងើបឡើងវិញនៃពាណិជ្ជកម្មសកល និងការបន្ធូរបន្ថយលក្ខខណ្ឌហិរញ្ញវត្ថុ នៅតែបន្តធ្វើជាកត្តាទ្រទ្រង់សេដ្ឋកិច្ចក្នុងតំបន់ក៏ដោយ ការកើនឡើងនៃលទ្ធិការពារនិយម និងភាពមិនប្រាកដប្រជានៃគោលនយោបាយ អាចនឹងសង្កត់កំណើនសេដ្ឋកិច្ចមិនឱ្យស្ទុះឡើងដែរ។
របាយការណ៍នោះមានឈ្មោះថា បច្ចុប្បន្នភាពស្ថានភាពសេដ្ឋកិច្ចតំបន់អាស៊ីបូព៌ា និងប៉ាស៊ីហ្វ៊ិក ខែមេសា ឆ្នាំ២០២៤ (East Asia and Pacific April 2024 Economic Update) បានបង្ហាញថា កំណើនសេដ្ឋកិច្ចក្នុងតំបន់សម្រាប់ឆ្នាំ២០២៤ ត្រូវបានព្យាករថានឹងមានត្រឹម ៤,៥% ទាបជាងក្នុងឆ្នាំមុនដែលមាន ៥,១%។ បើកាលណាមិនរាប់បញ្ចូលប្រទេសចិន តាមការគេព្យាករ កំណើននៃប្រទេសកំពុងអភិវឌ្ឍន៍ក្នុងតំបន់អាស៊ីបូព៌ា និងប៉ាស៊ីហ្វិក នឹងកើនឡើងដល់ ៤,៦% នៅក្នុងឆ្នាំនេះ កើនឡើងពី ៤,៤% ក្នុងឆ្នាំ២០២៣។ កំណើនសេដ្ឋកិច្ចនៅប្រទេសចិនត្រូវបានព្យាករថានឹងស្រកចុះបន្តិចមកនៅត្រឹម ៤,៥% ពី ៥,២% ក្នុងឆ្នាំ២០២៣ ដោយសារតែបំណុលមានកម្រិតខ្ពស់, វិស័យអចលនទ្រព្យចុះខ្សោយ និងវិវាទពាណិជ្ជកម្មដែលដាក់សម្ពាធទៅលើសេដ្ឋកិច្ច។ ក្នុងចំណោមប្រទេសកោះប៉ាស៊ីហ្វិក កំណើនត្រូវបានព្យាករថានឹងធ្លាក់ចុះមកនៅត្រឹម ៣,៦% ក្នុងឆ្នាំ២០២៤ ពី ៥,៦% នៅឆ្នាំមុន ដោយសារការស្ទុះងើបឡើងក្រោយជំងឺរាតត្បាតបានថមថយសន្ទុះរបស់វាទៅវិញ។ ការធ្លាក់ចុះនេះ មួយផ្នែក ឆ្លុះបញ្ចាំងឱ្យឃើញនូវការវិលមករកសន្ទុះធម្មតាវិញរបស់កំណើន ជាពិសេសនៅប្រទេសហ្វីជី ដែលកំណើនបានស្រុតចុះមកនៅត្រឹម ៣,៥% វិញក្នុងឆ្នាំ២០២៤ ពី ៨% ដែលជាកម្រិតលេចធ្លោ នៅក្នុងឆ្នាំមុន។
លោកស្រី Manuela V. Ferro អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក និយាយថា៖ ”តំបន់អាស៊ីបូព៌ា និងប៉ាស៊ីហ្វិក កំពុងរួមចំណែកខ្លាំដល់កំណើនសេដ្ឋកិច្ចពិភពលោក ថ្វីដ្បិតតែស្ថិតនៅក្នុងបរិការណ៍មួយដែលពិភពលោកជួបបញ្ហាប្រឈមកាន់តែច្រើន, មានភាពមិនប្រាកដប្រជាកាន់តែខ្លាំង, ប្រជាជនចាស់ជរាមានចំនួនកាន់តែច្រើន ហើយផលប៉ះទង្គិចពីការប្រែប្រួលអាកាសធាតុកាន់តែខ្លាំងក៏ដោយ”។ លោកស្រីមានប្រសាសន៍ទៀតថា៖ “ប្រទេសក្នុងតំបន់អាចរក្សាសន្ទុះកំណើនរបស់ខ្លួនបាន តាមរយៈការពន្លឿនការបើកឱ្យមានសកម្មភាពច្រើនថែមទៀត សម្រាប់ការវិនិយោគរបស់វិស័យឯកជន, ការដោះស្រាយបញ្ហាប្រឈមក្នុងវិស័យហិរញ្ញវត្ថុ និងការជំរុញផលិតភាព។”
ចក្ខុវិស័យក៏អាចប្រែប្រួលដែរនៅក្នុងសេណារីយោទាប ក្នុងនោះរួមមានការបន្តធ្លាក់ចុះនៃសេដ្ឋកិច្ចពិភពលោកលើសពីការរំពឹងទុក អត្រាការប្រាក់ខ្ពស់ហើយមានរយៈពេលយូរនៅក្នុងសេដ្ឋកិច្ចធំៗ ការកើនឡើងនូវភាពមិនប្រាកដប្រជាអំពីគោលនយោបាយសេដ្ឋកិច្ចនៅជុំវិញពិភពលោក និងការកើនឡើងនៃភាពតានតឹងភូមិសាស្ត្រនយោបាយ។
ជំពូកពិសេសមួយនៅក្នុងរបាយការណ៍នេះ បង្ហាញភស្តុតាងថា ផលិតភាពរបស់ក្រុមហ៊ុនឈានមុខធំៗនៅក្នុងតំបន់ មានការធ្លាក់ចុះបន្តិច បើធៀបទៅនឹងផលិតភាពរបស់ក្រុមហ៊ុនធំៗលើពិភពលោក។ គម្លាតខុសគ្នាមានសភាពធំខ្លាំងនៅក្នុងវិស័យដែលប្រើប្រាស់បច្ចេកវិទ្យាឌីជីថលច្រើន។ ដោយសារបច្ចេកវិទ្យាថ្មីៗ តាមធម្មតា តែងទទួលបានការទាក់ទាញមុនគេពីក្រុមហ៊ុនធំៗ មុននឹងពង្រាយខ្លួនទៅតាមធុរកិច្ចតូចៗផ្សេងទៀត និន្នាការនេះធ្វើឱ្យមានកង្វល់កាន់តែច្រើននៅតាមទិដ្ឋភាពនានារបស់ធុរកិច្ច។
ឧបសគ្គដល់ភាពប្រកួតប្រជែង, ជំនាញពលកម្មមិនស្មើគ្នា និងការគ្រប់គ្រងខ្សោយ ក៏រួមចំណែកធ្វើឱ្យបណ្តាក្រុមហ៊ុនមានកំណើនផលិតភាពទាបដែរ។ ការបើកការជួញដូរ និងសេវាកម្មឱ្យមានការប្រកួតប្រជែងកាន់តែខ្លាំង និងការលើកកម្ពស់មូលធនមនុស្ស តាមរយៈការវិនិយោគលើគ្រូបង្រៀន និងការអប់រំកម្រិតឧត្តមសិក្សា អាចជួយធ្វើឱ្យផលិតភាពកើនឡើងនាថ្ងៃអនាគត។
លោក Aaditya Mattoo សេដ្ឋវិទូរបស់ធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក និយាយថា៖ “ខណៈដែលប្រាក់ចំណូលសម្រាប់មនុស្សម្នាក់ៗនៅក្នុងតំបន់អាស៊ីបូព៌ា និងប៉ាស៊ីហ្វិក មានកំណើនវ៉ាដាច់ប្រាក់ចំណូលសម្រាប់មនុស្សម្នាក់ក្នុងប្រទេសកំពុងអភិវឌ្ឍន៍ដទៃទៀត ក្នុងប៉ុន្មានទសវត្សរ៍ចុងក្រោយនេះពិតមែន កំណើននោះបានមកដោយសារការវិនិយោគទេ ជាជាងដោយសារកំណើនផលិតភាព”។ លោកពោលបន្ថែមថា៖ “ចំណាត់ការមុះមុតផ្នែកគោលនយោបាយដើម្បីជំរុញសន្ទុះនៃការប្រកួតប្រជែង ការកែលម្អហេដ្ឋារចនាសម្ព័ន្ធ និងកំណែទម្រង់ក្នុងវិស័យអប់រំ ទាំងអស់នេះអាចជួយធ្វើឱ្យសេដ្ឋកិច្ចក្នុងតំបន់មានភាពរស់រវើកឡើងវិញ។”
Mark Felsenthal
About The World Bank
The World Bank Group has a bold vision: to create a world free of poverty on a livable planet. In more than 100 countries, the World Bank Group provides financing, advice, and innovative solutions that improve lives by creating jobs, strengthening economic growth, and confronting the most urgent global challenges. For more information, please visit www.worldbank.org, www.miga.org, and www.ifc.org.
- add-style