ធនាគារពិភពលោកអនុម័តថវិកាបន្ថែមចំនួន ៧៩,៥ លានដុល្លារអាមេរិក សម្រាប់​លើកកម្ពស់គុណភាព និងលទ្ធភាពទទួលបានការអប់រំ នៅកម្ពុជា

ទីក្រុងវ៉ាស៊ីនតោន ថ្ងៃទី៣០ ខែឧសភា ឆ្នាំ២០២៤ — ក្រុមប្រឹក្សានាយកប្រតិបត្តិរបស់ធនាគារពិភពលោក ថ្ងៃនេះ បានអនុម័តហិរញ្ញប្បទានបន្ថែមចំនួន ៧៩,៥លានដុល្លារអាមេរិក​ សម្រាប់​ការ​ពង្រីកសកម្មភាពដែលកំពុងត្រូវ​បាន​អនុវត្ត​​ ក្នុង​គោល​ដៅ​​​លើកកម្ពស់លទ្ធ​ភាព​ទទួលបានការអប់រំប្រកបដោយគុណភាព នៅទូទាំងប្រទេសកម្ពុជា។

មូលនិធិថ្មី​នេះនឹងត្រូវបាន​យក​ទៅ​ប្រើប្រាស់ដើម្បីពង្រីកគម្រោងកែលម្អការអប់រំទូទៅនៅកម្ពុជា ដែលត្រូវបានអនុម័តកាល​ពី​​​ខែមករា ឆ្នាំ២០២២ ជាមួយកញ្ចប់​ហិរញ្ញប្បទានលើក​ដំបូងចំនួន ៦៩,២៥លានដុល្លារអាមេរិក។ កញ្ចប់​ហិរញ្ញប្បទានបន្ថែមនេះ​មានឥណទានចំនួន ៦០លានដុល្លារអាមេរិកពី សមាគមអភិវឌ្ឍន៍អន្តរជាតិ ដែល​ជា​មូលនិធិរបស់ធនាគារពិភពលោកសម្រាប់ជួយជនខ្វះខាត​បំផុត និងជំនួយ​ចំនួន ១៩,៥លានដុល្លារ​ផ្សេងទៀត​ពីអង្គការ ភាពជាដៃគូសកលសម្រាប់ការអប់រំ។

លោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំនៅ​កម្ពុជា មានប្រសាសន៍ថា៖ “ប្រទេសកម្ពុជាបានប្រឹង​ប្រែង​យ៉ាងខ្លាំងក្នុងការពង្រីកលទ្ធភាពទទួលបានការអប់រំក្នុងរយៈពេលពីរទសវត្សរ៍ចុងក្រោយនេះ ប៉ុន្តែអ្វី​ដែលនៅតែជាបញ្ហាប្រឈមដ៏ធំនោះ គឺ​លទ្ធផលនៃការសិក្សារបស់សិស្សនៅ​មាន​កម្រិត​ទាប​ ហើយលទ្ធភាព​ទទួលបានការអប់រំប្រកប​ដោយគុណភាពក៏​នៅខ្វះ​​​សមធម៌ដែរ”។ លោកស្រី​និយាយ​បន្ថែម​ទៀត​ថា៖ “ការផ្តល់ហិរញ្ញប្បទានបន្ថែមនេះគឺ​ដើម្បី​ពង្រឹងថែម​ទៀត​នូវ​កិច្ចខិតខំប្រឹងប្រែងដើម្បីដោះស្រាយភាពក្រីក្រក្នុងការសិក្សា និងកសាងមូលធនមនុស្សដែលចាំបាច់​សម្រាប់ការ​លូតលាស់​នៃ​សេដ្ឋកិច្ច​ និងការអភិវឌ្ឍរបស់ប្រទេសកម្ពុជា។”កញ្ចប់​ហិរញ្ញប្បទានបន្ថែមនេះ​នឹងពង្រីកសកម្មភាពគម្រោងទៅកាន់គ្រឹះស្ថាន​អប់​រំ​ផ្សេង​ទៀត​នៅ​ទូទាំង​ប្រទេស ក្នុងនោះ​មាន​ អនុវិទ្យាល័យចំនួន ៥០០, សាលាបឋមសិក្សាចំនួន ១០០០ និងសាលាមត្តេយ្យចំនួន ៩០។ សកម្មភាពសំខាន់ៗរួមមាន៖

• ពង្រីកការគ្រប់គ្រងតាមសាលារៀននៅក្នុងសាលាផ្សេងទៀត,

• ផ្តល់ឱកាសបណ្តុះបណ្តាល និងអភិវឌ្ឍវិជ្ជាជីវៈបន្ថែមទៀតសម្រាប់គ្រូបង្រៀន ថ្នាក់​ដឹកនាំ​ និងបុគ្គលិកសាលា,

• សាងសង់ និងជួសជុលថ្នាក់រៀន បន្ទប់ពិសោធន៍ និងអគារសិក្សាបន្ថែមទៀត ក្រោម​ការរចនាដែលធន់នឹងអាកាសធាតុ,

• សាកល្បងដាក់​ឱ្យ​ប្រើ​បច្ចេកវិទ្យាអប់រំ ដើម្បីបង្កើនម៉ោងសិក្សាប្រកបដោយគុណភាព,

• ធ្វើទំនើបកម្មសៀវភៅសិក្សា និងបង្កើតមគ្គុទ្ទេសក៍គ្រូបង្រៀនស្របតាមកម្មវិធីសិក្សាជាតិ,

• ពង្រឹងការធ្វើផែនការ ការត្រួតពិនិត្យ និងការវាយតម្លៃ នៅ​តាមនីមួយៗ។

គម្រោងនេះសង្កត់ធ្ងន់លើភាព​ចាំបាច់នៃការបង្កភាពងាយស្រួលដល់កុមារមកពីក្រុមជួបការលំបាក គ្រួសារក្រីក្រ ឬសហគមន៍ជនជាតិដើម​ភាគតិច រួមទាំងអ្នកដែលនៅតំបន់ដាច់ស្រយាល ឬរស់នៅក្នុង​ពិការភាព​ ដើម្បីបានទៅសាលារៀន និងទទួលបានឱកាសសិក្សាប្រកបដោយគុណភាព។

លោកស្រី Laura Frigenti នាយកប្រតិបត្តិនៃអង្គការ ភាពជាដៃគូសកលសម្រាប់​ការ​អប់រំ មានប្រសាសន៍ថា៖ “អង្គការ​ភាពជាដៃគូសកលសម្រាប់ការអប់រំ នៅតែបន្តការប្តេជ្ញាចិត្តក្នុងការជួយកម្ពុជាក្នុងការពង្រីកការទទួលបានការអប់រំប្រកបដោយគុណភាពទៅដល់កុមារជាច្រើនទៀត ជាពិសេសកុមារក្រីក្របំផុត។” លោកស្រីបន្តទៀតថា៖ “មូលនិធិបន្ថែមនេះនឹងផ្តល់ជាឱកាសសម្រាប់បង្កើន​កិច្ចខិតខំប្រឹងប្រែងពង្រឹងប្រព័ន្ធអប់រំ និងពន្លឿនការងើបឡើងវិញនៃការសិក្សា បន្ទាប់ពីមាន​ការប៉ះពាល់បង្កដោយការ​រាតត្បាតជំងឺ​កូវីដ-១៩។”

អំពីធនាគារពិភពលោក

ធនាគារពិភពលោកមានចក្ខុវិស័យប្រកបដោយ​មហិច្ឆតា​មួយ គឺបង្កើតពិភពលោកមួយដែលគ្មានភាពក្រីក្រនៅលើភពផែនដីដែលជាទីជម្រក​សម្រាប់​ទាំង​អស់​គ្នា​។ ធនាគារពិភពលោកផ្តល់ហិរញ្ញប្បទាន ប្រឹក្សា និងដំណោះស្រាយប្រកបដោយភាពនវានុវត្តន៍ដើម្បីធ្វើឱ្យជីវភាពកាន់​តែ​ប្រសើរឡើង តាមរយៈការបង្កើតការងារ ពង្រឹងកំណើនសេដ្ឋកិច្ច និងការឆ្លើយ​តបភ្លាម​ៗ​ទៅ​នឹងបញ្ហាប្រឈមធំៗដែល​សកលលោកជួបប្រទះ​នៅ​ក្នុង​ការអភិវឌ្ឍ។ ធនាគារពិភពលោក គឺជាប្រភពមូលនិធិ​ និងចំណេះដឹងដ៏ធំបំផុតមួយសម្រាប់ប្រទេសកំពុងអភិវឌ្ឍន៍។ សមាសភាគ​របស់​ធនាគារ​រួមមាន ធនាគារអន្តរជាតិសម្រាប់ការកសាងឡើងវិញ និងអភិវឌ្ឍ (IBRD) ដែលជាសហករណ៍អភិវឌ្ឍន៍សកលគ្រប់គ្រងដោយប្រទេសសមាជិកចំនួន១៨៩ និងសមាគមអភិវឌ្ឍន៍អន្តរជាតិ (IDA) ដែលផ្តល់ជំនួយឥតសំណង និងកម្ចីការប្រាក់ទាប ឬសូន្យ ដើម្បីប្រយុទ្ធប្រឆាំងនឹងភាពក្រីក្រខ្លាំងនៅក្នុងចំណោម​ប្រទេសចំនួន ៧៥ ដែលក្រីក្រ និងងាយរងគ្រោះបំផុត លើ​ពិភពលោក។ សម្រាប់ព័ត៌មានបន្ថែម សូមចូលទៅកាន់គេហទំព័រ www.worldbank.org ។

អំពីអង្គការ​ ភាពជាដៃគូសកលសម្រាប់ការអប់រំ (GPE)

GPE គឺជាការប្តេជ្ញាចិត្តរួមគ្នាមួយ​សំដៅលុបបំបាត់វិបត្តិនៃការសិក្សារបស់ពិភពលោក។ យើងប្រមែប្រមូល​ដៃគូ និងមូលនិធិសម្រាប់​ជួយដល់ប្រទេសមានចំណូលទាបចំនួន ៩០ ក្នុង​ការកែលម្អ​ប្រព័ន្ធអប់រំរបស់ពួកគេជា​ប្រយោជន៍​ឱ្យក្មេងស្រី និងក្មេងប្រុសគ្រប់រូបអាចទទួលបានការអប់រំប្រកបដោយគុណភាពដែលពួកគេត្រូវការ ហើយ​អាច​ឈាន​ទៅបញ្ចេញសក្តានុពលរបស់ខ្លួនឱ្យ​បាន​ពេញលេញ រួមចំណែកក្នុងការកសាងពិភពលោកឱ្យកាន់តែប្រសើរឡើង។

About The World Bank

The World Bank Group has a bold vision: to create a world free of poverty on a livable planet. In more than 100 countries, the World Bank Group provides financing, advice, and innovative solutions that improve lives by creating jobs, strengthening economic growth, and confronting the most urgent global challenges. For more information, please visit www.worldbank.org, www.miga.org, and www.ifc.org.