វ៉ាស៊ីនតោន ថ្ងៃទី ៣១ ខែ មករា ឆ្នាំ ២០១៣ ‑ លោក អាកសែល វ៉ាន់ ត្រុតសេនប៊ើក ត្រូវ
បានលោក ជីម យ៉ុងគីម ប្រធានក្រុមធនាគារពិភពលោក តែងតាំងជាអនុប្រធានថ្មីនៃធនាគារ
ពិភពលោកប្រចាំតំបន់អាស៊ីបូព៌ានិងប៉ាស៊ីហិ្វក កាលពីថ្ងៃទី ១ ខែកុម្ភះ កន្លងទៅ។ លោក វ៉ាន់
ត្រុតសេនប៊ើក នឹងដឹកនាំផ្នែកសេវាកម្មផ្តល់យោបល់និងផ្នែកប្រតិបត្តិការផ្តល់កម្ចី នៅក្នុងតំបន់
មួយដែលមានភាពរស់រវើក ដែលបច្ចុប្បន្ននេះមានការរីកលូតលាស់ស្មើនឹង ៤០ភាគរយនៃ
កំណើនសេដ្ឋកិច្ចពិភពលោក។
លោក អាកសែល វ៉ាន់ ត្រុតសេនប៊ើក អនុប្រធានធនាគារពិភពលោកប្រចាំតំបន់អាស៊ី
បូព៌ានិងប៉ាស៊ីហិ្វក បានមានប្រសាសន៍ថា «ខ្ញុំមានក្តីរំភើបដោយបានចូលរួមជាមួយក្រុមការងារ
បម្រើដល់បណ្តាប្រទេសនៅក្នុងតំបន់អាស៊ីបូព៌ានិងប៉ាស៊ីហ្វិក ដែលជាតំបន់មួយឈានមុខគេក្នុង
ការធ្វើឲ្យកំណើនសេដ្ឋកិច្ចពិភពលោកមានការរីកលូតលាស់ និងកាត់បន្ថយបាននូវភាពក្រីក្រ
និងត្រូវការជាបន្តបន្ទាប់នូវគំនិតថ្មីនិងចំណេះដឹង។ យើងនឹងបន្តធ្វើការយ៉ាងជិតស្និទ្ធជាមួយ
បណ្តាប្រទេសទាំងអស់នៅក្នុងតំបន់នេះ ដើម្បីជួយផ្តល់នូវដំណោះស្រាយនានាពាក់ព័ន្ធទៅនឹង
ការអភិវឌ្ឍជាក់ស្តែង និងបង្កើតនូវឱកាសថ្មីៗសម្រាប់ប្រទេសទាំងអស់នេះ។»
លោក វ៉ាន់ ត្រុតសេនប៊ើក បាននាំមកជាមួយនូវបទពិសោធន៍ដ៏ច្រើនទាក់ទងនឹងការងារ
អភិវឌ្ឍន៍នៅលើពិភពលោក សម្រាប់មុខតំណែងរបស់លោក ដោយលោកបានបំពេញការងារ
ក្នុងការលើកកម្ពស់ជីវភាពរស់នៅរបស់ប្រជាពលរដ្ឋក្រីក្រនៅក្នុងបណ្តាប្រទេសជាច្រើន នៅ
គ្រប់ដំណាក់កាលទាំងអស់នៃការងារអភិវឌ្ឍ គឺចាប់តាំងពីប្រទេសដែលក្រីក្របំផុតរហូតដល់
ប្រទេសដែលមានប្រាក់ចំណូលមធ្យមក៏ដូចជានៅក្នុងបណ្តាប្រទេសដែលប៉ះពាល់ដោយភាព
ប្រេះស្រាំនិងមានជម្លោះផងដែរ។
នាពេលថ្មីៗនេះ ក្នុងឋានៈជាអនុប្រធានផ្នែកសម្បទានហរិញ្ញវត្ថុនិងភាពជាដៃគូសាកល លោក
វ៉ាន់ បានដឹកនាំការចរចារជាច្រើនដើម្បីដាក់បំពេញឡើងវិញនូវធនធានហិរញ្ញវត្ថុសម្រាប់
សមាគមអភិវឌ្ឍន៍អន្តរជាតិ ដែលជាមូលនិធិរបស់ធនាគារពិភពលោកសម្រាប់ប្រជាពលរដ្ឋក្រីក្រ
បំផុតដែលមានចំនួន ៤៩,៣ពាន់លានដុល្លារ សម្រាប់ប្រទេសក្រីក្រនៅលើពិភពលោក ក្នុង
រយៈពេលបីឆ្នាំ គិតត្រឹមថ្ងៃទី ៣០ ខែមិថុនា ឆ្នាំ ២០១៤។
នាពេលកន្លងទៅ នៅក្នុងប្រទេសអាមេរិកឡាទីននិងការីបង់ លោក វ៉ាន់ត្រុតសេនប៊ើក មាន
មុខតំណែងជានាយកប្រចាំប្រទេសមិចស៊ីកូនិងកូឡុំប៊ី ព្រមទាំងប្រទេសអាហ្សង់ទីន ឈីលី
ប៉ារ៉ាហ្គាយ និងអ៊ុយរ៉ាហ្គាយ ហើយលោកបានជួយធ្វើឲ្យប្រទេសដែលមានប្រាក់ចំណូល
មធ្យមមានលទ្ធភាពអាចទទួលបាននូវជោគជ័យរួម ។ ក្នុងឋានៈជាប្រធានគ្រប់គ្រងជាន់ខ្ពស់
នៃគំនិតផ្តួចផ្តើមស្តីអំពីប្រទេសក្រីក្រដែលជំពាក់បំណុលច្រើន លោកក៏បានត្រួតពិនិត្យមើល
ការរៀបចំកញ្ចប់រំលួសបំណុល ដែលមានចំនួន ៣៧ពាន់លានដុល្លារ សម្រាប់ប្រទេសចំនួន
២៤ ក្នុងចំណោមប្រទេសទីទ័លក្រទាំងអស់នៅលើពិភពលោក។
លោក វ៉ាន់ ត្រុតសេនប៊ើក ទទួលយកតួនាទីរបស់គាត់ក្នុងកាលៈទេសៈមួយដែលតំបន់អាស៊ី
បូព៌ានិងប៉ាស៊ីហ្វិកនៅបន្តរឹងមាំ ក៏ប៉ុន្តែមានបញ្ហាប្រឈមច្រើននៅក្នុងស្ថានភាពមួយដែល
សេដ្ឋកិច្ចសកលលោកចុះទន់ខ្សោយ។ តំបន់នេះក៏ងាយនឹងទទួលរងនូវផលប៉ះពាល់ផងដែរ
ដោយសារគ្រោះមហន្តរាយធម្មជាតិនិងការប្រែប្រួលអាកាសធាតុ។ នៅក្នុងតួនាទីថ្មីនេះ លោក
វ៉ាន់ នឹងបន្តធ្វើការជាមួយបណ្តាប្រទេសដែលមានប្រាក់ចំណូលមធ្យម ដើម្បីជួយប្រទេសទាំង
នេះទទួលបានប្រាក់ចំណូលកាន់តែខ្ពស់ឡើងថែមទៀត និងបង្កើនការគាំទ្រដល់បណ្តាប្រទេស
នៅលើកោះប៉ាស៊ីហ្វិក។
ក្នុងតួនាទីជាអនុប្រធានធនាគារប្រចាំតំបន់អាស៊ីបូព៌ានិងប៉ាស៊ីហ្វិក លោក វ៉ាន់ ត្រុតសេនប៊ើក
នឹងគ្រប់គ្រងផលប័ត្រដែលមានទឹកប្រាក់ចំនួន ៣១,៨ពាន់លានដុល្លារអាមេរិកនៅក្នុងធនាគារ
អន្តរជាតិសម្រាប់ការស្តារឡើងវិញនិងអភិវឌ្ឍន៍ និងក្នុងសមាគមអភិវឌ្ឍន៍អន្តរជាតិ។ ការផ្តល់
ប្រាក់កម្ចីដែលបានប៉ាន់ស្មានសម្រាប់ឆ្នាំសារពើពន្ធឆ្នាំ ២០១៣ មានចំនួន ៥,៨ពាន់លានដុល្លា
រអាមេរិក។
លោក វ៉ាន់ ត្រុតសេនប៊ើក មានសញ្ជាតិហូឡង់និងអូទ្រីស ហើយលោកមានកម្រិតវប្បធម៌ថ្នាក់
អនុបណ្ឌិតនិងបណ្ឌិតផ្នែកសេដ្ឋកិច្ច និងអនុបណ្ឌិតផ្នែកកិច្ចការអន្តរជាតិ។ លោក មកជំនួស
តំណែងរបស់លោកស្រី ប៉ាមេឡា ខក់ស៍ អតីតអនុប្រធានធនាគារពិភពលោកប្រចាំតំបន់អាស៊ី
បូព៌ានិងប៉ាស៊ីហ្វិក ដែលត្រូវបានតែងតាំងជាអនុប្រធានជាន់ខ្ពស់របស់ធនាគារពិភពលោកទទួល
បន្ទុកផ្នែកគ្រប់គ្រងការផ្លាស់ប្តូរ។
សម្រាប់ព័ត៌មានបន្ថែម សូមចូលទៅកាន់គេហទំព័ររបស់ធនាគារពិភពលោក
តាមអាសយដ្ឋាន៖ www.worldbank.org/eap
