ສປປ ລາວ: ໄດ້ຮັບອະນຸມັດທຶນຊ່ວຍເຫຼືອສຸກເສີນ ສໍາລັບທຸລະກິດຂະໜາດນ້ອຍ ແລະ ກາງ

ວໍຊິງຕັນ, 22 ຕຸລາ 2020 – ມື້ນີ້ ສະພາບໍລິຫານຂອງທະນາຄານໂລກ ໄດ້ອະນຸມັດທຶນຊ່ວຍເຫຼືອສຸກເສີນ ມູນຄ່າ 40 ລ້ານໂດລາສະຫະລັດ ເພື່ອສະໜັບສະໜູນບັນດາທຸລະກິດຂະໜາດນ້ອຍ ແລະ ກາງໃຫ້ສາມາດຟື້ນຕົວຈາກຜົນກະທົບຂອງພະຍາດລະບາດໂຄວິດ-19 ຢູ່ ສປປ ລາວ.

ທຶນຊ່ວຍເຫຼືອດັ່ງກ່າວແມ່ນຈະສະໜອງຜ່ານໂຄງການ ການເຂົ້າເຖິງແຫຼ່ງທຶນເພື່ອໃຫ້ການຊ່ວຍເຫຼືອສຸກເສີນ ແລະ ຟື້ນຟູຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ເຊິ່ງຈະຮ່ວມເຮັດວຽກກັບກະຊວງອຸດສາຫະກໍາ ແລະ ການຄ້າ ແລະ ບັນດາທະນາຄານທຸລະກິດ ພາຍໃນປະເທດ ເພື່ອສະໜອງສິນເຊື່ອໃຫ້ວິສາຫະກິດຂະໜາດນ້ອຍ ແລະ ກາງ ທີ່ພົບຄວາມຫຍຸ້ງຍາກໃນການຮັບມືກັບສະພາບເສດ ຖະກິດຖົດຖອຍ ອັນເປັນຜົນຍ້ອນພະຍາດລະບາດໂຄວິດ-19. ເປົ້າໝາຍຂອງໂຄງການ ແມ່ນເພື່ອເປີດໂອກາດໃຫ້ວິສາຫະກິດຂະໜາດ ນ້ອຍ ແລະ ກາງ ໃຫ້ສາມາດເຂົ້າເຖິງທຶນໝູນວຽນ ທີ່ຈະຊ່ວຍຮັກສາໃຫ້ທຸລະກິດຂອງເຂົາເຈົ້າຢູ່ລອດໃນໄລຍະວິກິດພະຍາດລະບາດ ແລະ ໃນໄລຍະການຟື້ນຕົວເບື້ອງຕົ້ນ ຫຼື ເຂົ້າເຖິງເງິນກູ້ເພື່ອການລົງທຶນ ສໍາລັບການລົງທຶນໃສ່ອຸປະກອນໃໝ່ໆ ຫຼື ການຂະຫຍາຍໂຮງຈັກ ໂຮງງານ.

ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ມີຄວາມສໍາຄັນຕໍ່ເສດຖະກິດຂອງສປປ ລາວ ເຊິ່ງ ປະກອບສ່ວນປະມານ 82 ສ່ວນຮ້ອຍເຂົ້າໃນການຈ້າງງານທັງໝົດ. ວິສາຫະກິດເຫຼົ່ານີ້ພົບວ່າຖືກກະທົບຢ່າງໜັກຈາກວິກິດການພະຍາດລະບາດໂຄວິດ-19, ຫຼາຍວິສາ ຫະກິດປະເຊີນກັບການຫຼຸດລົງຊັກໄຊ້ ດ້ານຄວາມຕ້ອງການ ແລະ ລາຍໄດ້ ຕະຫຼອດຮອດຕ່ອງໂສ້ການຜະລິດກໍ່ຖືກກະທົບ. ໃນໄຕມາດທີ ສອງຂອງປີ 2020 ພົບວ່າ ການທ່ອງທ່ຽວຢຸດນິ້ງ ແລະ ການຈໍາກັດການເຄື່ອນໄຫວໄປມາຂອງພົນລະເມືອງໃນເດືອນເມສາ ແລະ ພຶດສະພາ ເຮັດໃຫ້ຄວາມຕ້ອງການດ້ານການບໍລິການຕ່າງໆຖືກຈໍາກັດ ແລະ ເຮັດໃຫ້ການຜະລິດຢູ່ຫຼາຍວິສາຫະກິດຕ້ອງຍຸຕິຊົ່ວຄາວ. ບັນຫາເຫຼົ່ານີ້ ຄາດວ່າຈະເຮັດໃຫ້ຫຼາຍວິສາຫະກິດມີການປົດພະນັກງານຂອງຕົນໃນອັດຕາສ່ວນທີ່ສູງ ໃນຂະນະທີ່ເຄິ່ງໜຶ່ງຂອງເຈົ້າຂອງວິສາຫະກິດ ຮູ້ສຶກວ່າມີຄວາມເປັນໄປໄດ້ສູງທີ່ເຂົາເຈົ້າຕ້ອງໄດ້ປິດກິດຈະການຢ່າງຖາວອນ.

ທ່ານນາງ ມາຣຽມ ເຊີແມນ ຜູ້ອໍານວຍການ ທະນາຄານໂລກ ປະຈໍາ ມຽນມາ, ກໍາປູເຈຍ ແລະ ສປປ ລາວ ໄດ້ກ່າວວ່າ:“ໂຄງການໃໝ່ນີ້ ຈະຊ່ວຍບັນດາວິສາຫະກິດໃຫ້ຍັງສາມາດດໍາເນີນທຸລະກິດຂອງຕົນ, ປົກປ້ອງຊີວິດການເປັນຢູ່ຂອງພະນັກງານ ແລະ ຫຼຸດຜ່ອນຜົນກະທົບດ້ານເສດຖະກິດ-ສັງຄົມ ທີ່ເກີດຈາກພະຍາດລະບາດໂຄວິດ-19. “ໂຄງການດັ່ງກ່າວນີ້ ຈະສານຕໍ່ວຽກຈາກໂຄງການ ການເຂົ້າເຖິງແຫຼ່ງທຶນສໍາລັບວິສາຫະກິດຂະໜາດນ້ອຍແລະກາງ, ເຊິ່ງມີຜົນສໍາເລັດໃນການສະໜອງທຶນໃຫ້ SMEs ລາວ ນັບແຕ່ປີ 2014.”

ໂຄງການຈະສະໜອງແຫຼ່ງທຶນໃຫ້ບັນດາທະນາຄານທຸລະກິດທີ່ເຂົ້າຮ່ວມໂຄງການ ເຊິ່ງຈະເຮັດໜ້າທີ່ປ່ອຍກູ້ຕໍ່ໃຫ້ບັນດາວິສາຫະກິດທີ່ສົນ ໃຈ. ພ້ອມນີ້, ທະນາຄານໂລກ ຈະສະໜອງການຊ່ວຍເຫຼືອທາງດ້ານວິຊາການ ເພື່ອສ້າງຂີດຄວາມສາມາດໃຫ້ທະນາຄານແຫ່ງ ສປປ ລາວ ໃນການຄຸ້ມຄອງກົນໄກຄໍ້າປະກັນສິນເຊື່ອ. ວິທີນີ້ ຈະຊ່ວຍຫຼຸດຜ່ອນຄວາມສ່ຽງດ້ານສິນເຊື່ອ ທີ່ຕິດພັນກັບເງິນກູ້ທີ່ປ່ອຍໃຫ້ພາຍໃຕ້ ໂຄງການ ເຊິ່ງເປັນການຊ່ວຍໃຫ້ບັນດາທະນາຄານທຸລະກິດທີ່ເຂົ້າຮ່ວມໂຄງການ ສາມາດສືບຕໍ່ສະໜອງການເຂົ້າເຖິງແຫຼ່ງທຶນ. ນອກຈາກນີ້, ໂຄງການຍັງຈະສະໜອງການຊ່ວຍເຫຼືອທາງດ້ານວິຊາການ ເພື່ອສ້າງຄວາມເຂັ້ມແຂງໃຫ້ບັນດາທະນາຄານທຸລະກິດ, ວິສາຫະກິດ ຂະໜາດນ້ອຍ ແລະ ກາງ, ກະຊວງ ອຸດສາຫະກໍາ ແລະການຄ້າ ແລະ ບັນດາສະຖາບັນອື່ນໆທີ່ເຂົ້າຮ່ວມໂຄງການ. ປະຈຸບັນ ມີທະນາຄານ ທຸລະກິດທີ່ມີຊື່ສຽງ ຫ້າແຫ່ງແລ້ວ ທີ່ໄດ້ສະແດງຄວາມສົນໃຈເຂົ້າຮ່ວມໂຄງການ.

ເພື່ອໃຫ້ບັນລຸໄດ້ເງື່ອນໄຂໃນການຮັບເງິນກູ້ພາຍໃຕ້ໂຄງການ, ວິສາຫະກິດທີ່ເຂົ້້າຮ່ວມຕ້ອງຈົດທະບຽນເປັນວິສາຫະກິດຖືກຕ້ອງ ກໍ່ຄືຈຸນລະວິສາ ຫະກິດ (ມີພະນັກງານ 1-5 ຄົນ), ວິສາຫະກິດຂະໜາດນ້ອຍ (ມີພະນັກງານ 6-50 ຄົນ) ຫຼື ເປັນວິສາຫະກິດຂະໜາດກາງ (ມີພະ ນັກງານ 51-99 ຄົນ). ການຕັດສິນໃຈອະນຸມັດເງິນກູ້ ແລະ ການກໍານົດອັດຕາດອກເບ້ຍເງິນກູ້ ແມ່ນຂຶ້ນກັບທະນາຄານທຸລະກິດທີ່ເຂົ້າ ຮ່ວມໂຄງການ ເຊິ່ງຈະດໍາເນີນການບົນພື້ນຖານການປະເມີນອະນຸມັດສິນເຊື່ອຕາມລະບຽບຫຼັກການພາຍໃນຂອງເຂົາເຈົ້າ.

About The World Bank

The World Bank Group has a bold vision: to create a world free of poverty on a livable planet. In more than 100 countries, the World Bank Group provides financing, advice, and innovative solutions that improve lives by creating jobs, strengthening economic growth, and confronting the most urgent global challenges. For more information, please visit www.worldbank.org, www.miga.org, and www.ifc.org.