- add-style
- font-medium
- lp-body-content
វ៉ាស៊ីនតោនឌីស៊ី ថ្ងៃទី ២១ ខែមករា ឆ្នាំ ២០២៦ — តំបន់អាស៊ីបូព៌ា និងប៉ាស៊ីហ្វិក កំពុងស្ថិតនៅលើចំណុចផ្លូវបំបែកមួយ ដោយសារជំងឺរ៉ាំរ៉ៃ និងជំងឺមិនឆ្លង មានការកើនឡើងខ្លាំង គំរាមកំហែងដល់ប្រព័ន្ធសុខាភិបាល និងធ្វើឱ្យប្រាក់ចំណូលនៅទ្រឹងកើនលែងរួច។ របាយការណ៍ថ្មីរបស់ធនាគារពិភពលោក ដែលមានឈ្មោះថា អនាគតដែលមានសុខភាពល្អ៖ ការថែទាំសុខភាពបឋម និងការរីករាលដាលនៃជំងឺរ៉ាំរ៉ៃនៅតំបន់អាស៊ីបូព៌ា និងប៉ាស៊ីហ្វិក បង្ហាញថា កំណែទម្រង់បន្ទាន់ក្នុងការថែទាំសុខភាពបឋម អាចជួយតំបន់អាស៊ីបូព៌ា និងប៉ាស៊ីហ្វិក ក្នុងការឆ្លើយតបទៅនឹងបញ្ហាប្រឈមដែលកំពុងកើនឡើងនេះ និងធានាបាននូវសុខភាពកាន់តែប្រសើរ អនាគតកាន់តែរីកចម្រើន សម្រាប់ប្រជាជនក្នុងតំបន់។
បើមើលពីជ្រុងសេដ្ឋកិច្ច ការកែទម្រង់នេះពិតជាមានប្រយោជន៍ណាស់ ព្រោះការប៉ាន់ប្រមាណបានបង្ហាញថា ការថែទាំសុខភាពបឋមរឹងមាំ នាំមកនូវផលចំណេញខ្ពស់ ដោយក្នុងនោះ រាល់ការវិនិយោគ ១ ដុល្លារអាម៉េរិក ផ្តល់ផលចំណេញដល់សេដ្ឋកិច្ចរហូតដល់ទៅ ១៦ ដុល្លារ តាមរយៈសុខភាព ផលិតភាព និងការងារកាន់តែប្រសើរ។
លោក Carlos Felipe Jaramillo អនុប្រធានធនាគារពិភពលោក សម្រាប់ អាស៊ីបូព៌ា និងប៉ាស៊ីហ្វិក មានប្រសាសន៍ថា៖ «ប្រព័ន្ធថែទាំសុខភាពបឋមដ៏រឹងមាំ នាំមកនូវអត្ថប្រយោជន៍ច្រើនជាងការការពារសុខុមាលភាពទៅទៀត។ មនុស្សមានសុខភាពល្អ រៀនបានកាន់តែច្រើន ធ្វើការកាន់តែមានផលិតភាព និងសន្សំ និងវិនិយោគបានកាន់តែច្រើន - ទាំងអស់នេះជាអត្ថប្រយោជន៍ដែលជួយប្រទេសក្នុងការពង្រីកឱកាស កសាងមូលធនមនុស្ស បង្កើតការងារ និងជំរុញឱ្យមានវិបុលភាពសម្រាប់ទាំងអស់គ្នា»។ លោកមានប្រសាសន៍បន្ថែមទៀតថា៖ «តំបន់អាស៊ីបូព៌ា និងប៉ាស៊ីហ្វិក ចូលរួមចំណែកក៏សំខាន់មួយនៃគោលដៅរបស់ធនាគារពិភពលោកក្នុងការផ្តល់សេវាសុខភាពប្រកបដោយគុណភាព និងតម្លៃសមរម្យដល់ប្រជាជន ១,៥ ពាន់លាននាក់ ដល់ឆ្នាំ ២០៣០។ កំណែទម្រង់នៃការថែទាំសុខភាពបឋម ដើម្បីដោះស្រាយបញ្ហាប្រឈមសុខភាពបន្ទាន់បំផុតនៅក្នុងតំបន់ នឹងមានសារៈសំខាន់ខ្លាំងដើម្បីជួយឱ្យសម្រេចបានគោលដៅនោះ។»
ក្នុងរយៈពេលបីទស្សវត្សកន្លងមកនេះ បណ្តាប្រទេសក្នុងតំបន់អាស៊ីបូព៌ា និងប៉ាស៊ីហ្វិក សម្រេចបានសមិទ្ធផលផ្នែកសុខភាពបានច្រើនគួរឱ្យកត់សម្គាល់ ក្នុងនោះ អត្រាមរណភាពក្រោមអាយុ ៥ឆ្នាំ បានធ្លាក់ចុះពី ៥៧ នាក់មកនៅត្រឹម ១៥នាក់ ក្នុង ១ ០០០ កំណើតរស់ ហើយអាយុកាលរស់បានកើនពី ៦៨ ទៅ ៧៧ឆ្នាំ។ ទោះយ៉ាងណាក៏ដោយ បើទុកជាមនុស្សរស់បានអាយុវែងជាងមុន ពួកគេបានចំណាយពេលជិតមួយទសវត្សរ៍រស់នៅដោយមានសុខភាពមិនល្អ។ ទន្ទឹមនឹងការវិវត្តទៅមុខនូវវ័យរបស់ប្រជាជន និងការពង្រីកនៃទីក្រុង បែបផែនរស់នៅដែលមានសុខភាពមិនសូវល្អ ក៏កំពុងនាំឱ្យមានការកើនឡើងផងដែរនូវជំងឺរ៉ាំរ៉ៃ និងជំងឺមិនឆ្លង ក្នុងចំណោមមនុស្សពេញវ័យ នៅក្នុងដំណាក់កាលនៃឆ្នាំដែលពួកមានផលិតភាពបំផុត ហើយតាមរយៈនេះ វាកាត់បន្ថយនូវផលិតភាព និងបង្កើនថ្លៃចំណាយកាន់តែច្រើនទៅលើការទាំសុខភាព។
ការបង្ការ គឺជាខ្សែការពារទីមួយប្រឆាំងនឹងជំងឺរ៉ាំរ៉ៃ និងជំងឺមិនឆ្លង។ សេវាថែទាំសុខភាពបឋម - ដូចជាការពិនិត្យមើល, ការរកឃើញជំងឺទាន់ពេល និងការព្យាបាល - មានសារៈសំខាន់ណាស់សម្រាប់ការបង្ការ និងគ្រប់គ្រងជំងឺទាំងនេះ ដើម្បីកុំឱ្យប្រជាជនធ្លាក់ខ្លួនឈឺត្រូវចូលមន្ទីរពេទ្យ។ យ៉ាងណាក៏ដោយ នៅក្នុងប្រទេសតំបន់អាស៊ីបូព៌ា និងប៉ាស៊ីហ្វិក ជាច្រើន គ្រឹះស្ថានសេវាថែទាំសុខភាពច្រើននៅតែផ្តោតលើការព្យាបាល ជាជាងការបង្ការទប់ស្កាត់។ ការយល់ដឹងអំពីហានិភ័យនៃជំងឺរ៉ាំរ៉ៃ និងជំងឺមិនឆ្លង នៅមានកម្រិតទាប ហើយមនុស្សជាច្រើនយល់ថាសេវាថែទាំសុខភាពបឋម នៅមិនទាន់គ្រប់គ្រាន់ទេ។ ជាលទ្ធផល វាធ្វើឱ្យគ្រួសារជាច្រើនមិនរវីរវល់ជាមួយការថែទាំនៅតាមគ្រឹះស្ថានសេវាថែទាំបឋម ឬមួយក៏ទៅមន្ទីរពេទ្យដោយផ្ទាល់តែម្តង ហេតុនេះ សេវាថែទាំសុខភាពបឋមមិនត្រូវបានប្រើប្រាស់ឱ្យទាន់ពេលវេលា ហើយសេវាបង្ការក៏មិនត្រូវបានប្រើប្រាស់ឱ្យបានពេញទំហឹងដែរ។
លោក Aaditya Mattoo ប្រធានសេដ្ឋវិទូអាស៊ីបូព៌ា និងប៉ាស៊ីហ្វិក នៃធនាគារពិភពលោក មានប្រសាសន៍ថា៖ «ការកែលម្អការថែទាំសុខភាពបឋមមានសារៈសំខាន់សម្រាប់កំណើនប្រកបដោយចីរភាពនៅក្នុងតំបន់អាស៊ីបូព៌ា និងប៉ាស៊ីហ្វិក។ តាមរយៈការវិនិយោគលើការបង្ការ ការចាប់យកនវានុវត្តន៍ និងការពង្រឹងសេវាសុខភាពកម្រិតសហគមន៍ បណ្តាប្រទេសនៅអាស៊ីបូព៌ា និងប៉ាស៊ីហ្វិក នឹងបង្កើតបានឱកាសថ្មីៗសម្រាប់វឌ្ឍនភាពសេដ្ឋកិច្ច និងលើកកម្ពស់គុណភាពនៃជីវភាពរបស់ប្រជាជន នៅក្នុងទូទាំងតំបន់។»
របាយការណ៍នេះបានសង្កត់ធ្ងន់ថា កំណែទម្រង់ត្រូវតែស្របតាមសមត្ថភាពហិរញ្ញវត្ថុ និងបច្ចេកទេសរបស់ប្រទេសនីមួយៗ ព្រមទាំងបរិបទនយោបាយផងដែរ។ របាយការណ៍បានលើកឡើងនូវអនុសាសន៍ចំនួនបួន៖ ទីមួយ ការបំពាក់ឱ្យអ្នកផ្តល់សេវា ថែទាំសុខភាពបឋម នូវហេដ្ឋារចនាសម្ព័ន្ធ ឧបករណ៍ និងជំនាញ ដើម្បីឆ្លើយតបទៅនឹងជំងឺរ៉ាំរ៉ៃ និងជំងឺមិនឆ្លង។ ទីពីរ កែលម្អគុណភាពនៃការថែទាំតាមរយៈការពិនិត្យតាមដាន និងផ្តល់រង្វាន់ដល់អ្នកផ្តល់សេវា ដើម្បីទទួលបានលទ្ធផលកាន់តែល្អ ថែមទៀត។ ទីបី ធ្វើឱ្យសេវាថែទាំសុខភាពបឋមមានតម្លៃសមរម្យ ឬឥតគិតថ្លៃតែម្តង សម្រាប់អ្នកមានប្រាក់ចំណូលទាប។ ជាចុងបញ្ចប់ ជូនដំណឹង ជំរុញ និងលើកទឹកចិត្តប្រជាជនឱ្យទទួលយករបៀបរស់នៅដែលមានសុខភាពកាន់តែល្អ រួមទាំងការស្វែងរកការថែទាំបង្ការជំងឺឈឺថ្កាត់ ផងដែរ។
(ទាញយករបាយការណ៍) Download the report
សម្រាប់ព័ត៌មានបន្ថែម សូមចូលទៅកាន់៖ www.worldbank.org/eap
ធ្វើបច្ចុប្បន្នភាពតាមរយៈTwitter: @WB_AsiaPacific
សម្រាប់ឆានែលយូធូបរបស់យើង (YouTube)៖ www.youtube.com/worldbank
World Bank Media Relations
About The World Bank
The World Bank Group has a bold vision: to create a world free of poverty on a livable planet. In more than 100 countries, the World Bank Group provides financing, advice, and innovative solutions that improve lives by creating jobs, strengthening economic growth, and confronting the most urgent global challenges. For more information, please visit www.worldbank.org, www.miga.org, and www.ifc.org.
- add-style