សង្ខេបរឿង៖
- អ្នកស្រី ប៉ាក់ ចាន់ណា ជាអ្នកសម្របសម្រួលផ្នែកគណនេយ្យភាពសហគមន៍ម្នាក់ ក្នុងចំណោម ៣ ៥២៣នាក់នៅកម្ពុជា។ កាលមុន គាត់ជាអ្នករើសអេតចាយនៅតាមតំបន់អនាធិបតេយ្យក្នុងទីក្រុងភ្នំពេញ។ ដំណើរប្រែប្រួលក្នុងជីវិតរបស់គាត់មកដល់ពេលបច្ចុប្បន្ន ជាឧទាហរណ៍មួយឆ្លុះបញ្ចាំងអំពីអានុភាពបែបបរិវត្តន៍នៃគំនិតផ្តួចផ្តើមដោយគណនេយ្យភាពសង្គម។
- វេទិកា គណនេយ្យភាពសង្គម ដែលបានធ្វើឡើងនៅរាជធានីភ្នំពេញនៅថ្ងៃទី២៩ ខែមីនា ឆ្នាំ២០២៤ មានការចូលរួមពីសំណាក់រាជរដ្ឋាភិបាល អង្គការសង្គមស៊ីវិល ដៃគូអភិវឌ្ឍន៍ ប្រព័ន្ធផ្សព្វផ្សាយ និងក្រុមយុវជន ដើម្បីរំលេចឱ្យឃើញអំពីឥទ្ធិពលនៃការចូលរួមរបស់ពលរដ្ឋ នៅក្នុងការងារផ្តល់សេវាសាធារណៈ។
- ធនាគារពិភពលោកកំពុងគាំទ្រគម្រោងគណនេយ្យភាពសង្គមចំនួនពីរ ដែលមានគោលដៅលើកកម្ពស់ការអនុវត្តសេវាសាធារណៈ ដោយជូនដំណឹងឱ្យប្រជាពលរដ្ឋបានដឹងអំពីសិទ្ធិរបស់ខ្លួន លើកទឹកចិត្តពួកគេឱ្យចូលរួមក្នុងការតាមដាន និងវាយតម្លៃអ្នកផ្តល់សេវា និងជំរុញឱ្យមានការសន្ទនារវាងប្រជាពលរដ្ឋ និង អាជ្ញាធរមូលដ្ឋាន។
មានដើមកំណើតនៅក្នុងទីក្រុងភ្នំពេញ អ្នកស្រី ប៉ាក់ ចាន់ណា ធ្លាប់ឆ្លងកាត់ការស៊ូទ្រាំនឹងភាពក្រីក្រ និងការមាក់ងាយមិនរាប់រករបស់សង្គម។ ក្នុងអតីតភាពជាអ្នកប្រមូលសំរាមឬអ្នករើសអេតចាយ គាត់តែងត្រូវបានអ្នកជិតខាងមិនរាប់រក ហើយការតស៊ូប្រឹងប្រែងរបស់គាត់ដើម្បីចិញ្ចឹមគ្រួសារ ក៏តែងទទួលបានការមើលងាយពីសំណាក់អ្នកដទៃដែរ។ អ្នកស្រីរំឭកទាំងទឹកភ្នែកថា៖ «ពេលគេប្រដៅកូនរបស់គេ អ្នកជិតខាងតែងតែយកស្ថានភាពគ្រួសារខ្ញុំទៅប្រៀបធៀងឱ្យកូនគេស្តាប់។ ហេតុអ្វីកូនឯងមិនទៅសាលា? ចង់ក្លាយជាអ្នករើសសំរាមដូចពួកហ្នុង ចង់ក្ររហាម ហើយគ្មានអ្នកណាចង់រាប់រកជាមួយ ឬយ៉ាងម៉េច?»
ជីវិតរបស់ អ្នកស្រី ប៉ាក់ ចាន់ណា បានផ្លាស់ប្តូរក្រោយពីគាត់បានក្លាយខ្លួនជាអ្នកសម្របសម្រួលផ្នែកគណនេយ្យភាពសហគមន៍ របស់គម្រោង Social Accountability projects ចំនួនពីរ ដែលមានរាជរដ្ឋាភិបាលកម្ពុជា និងអង្គការទស្សនៈពិភពលោកអន្តរជាតិ ជាអ្នកអនុវត្តន៍ ដោយមានការគាំទ្រពីធនាគារពិភពលោក ប្រទេសស្វ៊ីស អាល្លឺម៉ង់ និងអូស្ត្រាលី។ គម្រោងទាំងនេះព្យាយាមលើកកម្ពស់សមិទ្ធកម្មរបស់សេវាសាធារណៈ តាមរយៈការជូនដំណឹងឱ្យប្រជាពលរដ្ឋបានដឹងអំពីសិទ្ធិរបស់ខ្លួន លើកទឹកចិត្តឱ្យពួកគេចូលរួមនៅក្នុងការវាយតម្លៃអ្នកផ្តល់សេវា និងជំរុញឱ្យមានការសន្ទនារវាងប្រជាពលរដ្ឋ និងអាជ្ញាធរមូលដ្ឋាន។
នៅក្នុង វេទិកាគណនេយ្យភាពសង្គម ដែលត្រូវបានរៀបចំឡើងនៅទីក្រុងភ្នំពេញកាលពីថ្ងៃទី២៩ ខែមីនា ឆ្នាំ២០២៤ អ្នកស្រី ប៉ាក់ ចាន់ណា បានចែករំលែករឿងរ៉ាវរបស់គាត់ជាមួយភ្ញៀវចូលរួមប្រមាណជាង ២៧០នាក់ ដែលមកពីក្រសួងនានារបស់រាជរដ្ឋាភិបាល អង្គការសង្គមស៊ីវិល ទីភ្នាក់ងារអន្តរជាតិ ប្រព័ន្ធផ្សព្វផ្សាយ និងក្រុមយុវជន។
លោកស្រីរៀបរាប់ដូច្នេះថា៖ «ពេលចាប់ផ្តើមជាអ្នកសម្របសម្រួលដំបូង ខ្ញុំមានអារម្មណ៍ភ័យខ្លាច និងថប់បារម្ភ។ ខ្ញុំខ្លាច ហើយញ័រនៅពេលសម្របសម្រួលកិច្ចប្រជុំក្រុមប្រឹក្សា ជួនកាលនិយាយរដាក់រដុប។ ប៉ុន្តែ ដោយបានទទួលការបណ្តុះបណ្តាលពីអង្គការទស្សនៈពិភពលោក យូរៗទៅខ្ញុំកាន់តែមានភាពក្លាហាន និងទំនុកចិត្តលើខ្លួនឯង។»
ការរ៉ាយរ៉ាប់របស់គាត់ត្រូវបានផ្សាយផ្ទាល់តាម Facebook ដែលមានអ្នកទស្សនាចំនួនជាង ៦៧ ០០០នាក់ មើល។
អ្នកសម្របសម្រួលដូច អ្នកស្រី ប៉ាក់ ចាន់ណា ដើរតួនាទីយ៉ាងសំខាន់ក្នុងការជំរុញឱ្យមានការពិភាក្សាប្រកបដោយស្មោះត្រង់ និងស្ថាបនា រវាងប្រជាពលរដ្ឋ អ្នកផ្តល់សេវា និងរដ្ឋាភិបាលមូលដ្ឋាន និងក្នុងការលើកសំណើដំណោះស្រាយ ដែលជួយជំរុញឱ្យមានការកែលម្អសំខាន់នៅក្នុងការថែទាំសុខភាព ការអប់រំ និងសេវារដ្ឋបាល ពីសំណាក់រដ្ឋបាលក្នុងមូលដ្ឋាន។ គម្រោងគណនេយ្យភាពសង្គមទាំងនេះ បានធ្វើឱ្យទំហំភាគចំណែករបស់អ្នកផ្តល់សេវានៅក្នុងតំបន់គោលដៅរបស់គម្រោងដែលបំពេញបានតាមស្តង់ដាសេវាកម្មសំខាន់ៗ មានចំនួនកើនឡើងដល់ ៨៤ ភាគរយ ក្នុងឆ្នាំ២០២៣ ពី ៤២ភាគរយ ក្នុងឆ្នាំ២០២០។ នៅក្នុងនោះ អ្នកសម្របសម្រួលទទួលបានការបណ្តុះបណ្តាលអំពីការផ្សព្វផ្សាយព័ត៌មាន, ថវិកាមានតម្លាភាព, ការតាមដានរបស់ប្រជាពលរដ្ឋតាមរយៈតារាងពិន្ទុសហគមន៍, ជំនាញសម្របសម្រួល និងភាពជាអ្នកដឹកនាំ ដើម្បីគាំទ្រសកម្មភាពរួម។ ពួកគេក៏ទទួលបានផងដែរនូវការណែនាំ បង្វឹកលើការតាមដានក្នុងពេលអនុវត្តការងារផ្ទាល់ ដែលជួយពួកគេឱ្យបង្កើនសមត្ថភាព និងភាពជឿជាក់លើខ្លួនឯង បានកាន់តែខ្ពស់ថែមទៀត។
គណនេយ្យភាពសង្គម ក៏អាចជួយមនុស្សឱ្យមានលទ្ធភាពចូលប្រើសេវាសាធារណៈបានកាន់តែច្រើនដែរ។ នៅតាមជនបទនៃប្រទេសកម្ពុជា កាលពីរទស្សវត្សរ៍មុន ប្រហែលពាក់កណ្តាលនៃចំនួនប្រជាជនជាអ្នកមិនចេះអក្សរ, ប្រជាពលរដ្ឋជាច្រើនមិនបានដឹងពីសិទ្ធិរបស់ខ្លួន និងខ្វះព័ត៌មានអំពីសេវាកម្មដែលពួកគេមានសិទ្ធិទទួលបាន។ ជនក្រីក្របំផុតតែងតែមិនដឹងថាពួកគេមានសិទ្ធិទទួលបានការថែទាំសុខភាពដោយមិនគិតថ្លៃ នោះទេ។
ដំណើរជីវិតរបស់អ្នកស្រី ប៉ាក់ ចាន់ណា ពីមនុស្សស្ងៀមស្ងាត់ទៅជាមនុស្សម្នាក់រឹងប៉ឹង គឺជាសក្ខីកម្មបញ្ជាក់អំពីសក្តានុពលបែបបរិវត្តន៍នៃការចូលរួមរបស់ប្រជាពលរដ្ឋ។ តាមរយៈការបង្កើនភាពអង់អាច និងសកម្មភាពរួមគ្នា បុគ្គលម្នាក់ៗអាចបញ្ចេញយោបល់របស់ខ្លួន និងក្លាយជាកាតាលីករជំរុញឱ្យមានការប្រែប្រួលប្រកបដោយអត្ថន័យនៅក្នុងសហគមន៍របស់ពួកគេ។
